Traffic enforcer sa Dakbayan sa Sugbo gipusasan human ma-entrap sa Huwebes sa alas 8:55 sa gabii, Hunyo 17, 2021, sa mga sakop sa Criminal Investigation and Detection Group 7 (CIDG) sa giingong pagpangilkil sa mga driver nga iyang madakpan sa salaud sa trapiko.
Ang nasikop sa entrapment sa dalan MJ Cuenco sa Barangay Carreta mao si Roger Cadutdut, 39, usa ka job order nga na-assign sa Cebu City Traffic Office (CCTO).
Matod ni CIDG 7 Chief Police Colonel Ireneo Dalogdog, nidangop kanila ang officer-in-charge sa CCTO, Lyntoni Alburo, aron magpatabang nga madakpan ang iyang personnel labot sa illegal niini nga kalihukan.
Duna siyay video nga gipakita nga magpamatuod nga nangayog kwarta si Cadutdut sa iyang dinakpan hinungdan nga ilang giplanohan ang pag dakop niini.
Nagpa-dispatch dayon ang CIDG 7 og undercover nga pulis nga nagpatuo nga usa ka driver.
Ang driver nagpadakop kang Cadutdut ug sa dihang naestorya na niini ang traffic enforcer, nangayo na usab kinig kwarta bugti sa di pagdakop kaniya.
Sa dihang natunol na ang marked money, nipaila na dayon ang driver nga usa siya ka pulis ug gipusasan si Cadutdut ug didto sa iyang posisyon nakuha ang P1,000 nga bill.
“Mayroon kaming isang undercover operative na nagpanggap na isang driver tapos may na violate doon na traffic rules. Tapos lumapit ito si ano si Cadutdut at habang nag uusap sila, nagde-demand na naman siya ng pera. So hindi na nya alam na ang pera na yun ay dusted money which is tinanggap nya at nakuha sa kanyang possession yung marked money,” matod ni Dalogdog.
Matod ni Alburo nga daghan na ang reklamo nga nadangat sa iyang buhatan labot sa illegal nga kalihukan ni Cadutdut.
Duna siyay video nga gihuptan sa pagpangilkil niini sa usa ka driver.
Wa magtuo si Alburo nga buhaton gihapon kini sa iyang personnel bisan kon si Cadutdut nasayod na nga nakahibawo na siya sa iyang salaod nga nahimo./PAC