Mopadala og pormal nga hangyo ang National Bureau of Investigation (NBI-7) ngadto sa Central Bank of the Philippines nga tugotan nga makakuha og detalye ang buhatan sa mga tawo nga nangilad o nang-hacked og bank accounts.
Kini maoy lakang nga gibutyag ni Maria Contisa Lastimoso, special Investigator sa NBI 7, subay sa gipatuman nga privacy act sa mga banko.
Matod ni Lastimoso nga moabot sa 15 o sobra pa ang mga reklamo sa hacking ug phising.
Ang pagpangilad gituohan sa buhatan nga nidaghan ilabi ning panahon sa pandemya diin nasinati ang krisis ug huwaw sa panudlanan sa mga tawo.
“Daghan man gud ilabi na this pandemic nag tuon, nakakat-on unya once naka try na sila og hack unya nakakuha na sila og particular amount, it becomes an
addiction magsige na dayon na og explore,” matod ni Lastimoso.
Gipasabot niya nga bisan paman og dunay daghan nga moreklamo apan mahimong limitado ang imbestigasyon sa buhatan kon walay kompleto nga detalye.
“When you lost your money sa imong depository bank, they will never return your money because they would always claim nga there is a two-way verification process, imo na siya nga contributory negligence. Daghan kaayo ta og cases ana diri which we try to appeal sa Central Bank and unfortunately naa tay bag-ong guideline sa Central Bank dili gyud sila mo allow nga ihatag ang account details sa scammer,s” matod ni Lastimoso.
Subay sa Republic Act 1405 gi-dili ang pagbutyag sa bisan unsa nga inquiry o pag disclose sa mga detalye.
Aron malikayan ang bisan unsang paagi sa pagpangilad ilabi na sa social media, kinahanglan nga dili mo-accept ug friend request sa mga dili kaila, kanunayon ang pag change sa password sa accounts, dili i synchronized ang social media sites ug i-lain ang account alang sa savings, payroll ug debit.
“Ang isa sa important gyud if kanang tanan friends nimo sa Facebook nakaila ba gyud ka ana kay that should be part of your security. Dapat security conscious ta these days kay since the pandemic grabe gyud ang hacking...those are tye things that we have to ponder on kung unsa ray dapat i-share online...kay kana siya its one of the breaches gyud,” matod ni Lastimoso sa Superbalita Cebu.
Mahimo kining isumbong sa NBI pinaagi sa pag kuha og hulagway o ba kaha screenshot sa mga detalye o conversations sa hacker aron ma susi og ma imbestigaran sa buhatan.
Nanghinaot ang buhatan nga magbinantayon ang publiko sa bisan unsang paagi o klase sa pagpangilad ilabi na ning panahon sa krisis sa pademiya sa Covid-19. / ANV