Kanding nakaluwas sa usa sa mga biktima sa pagpang-ambush niadtong Enero 17, 2021 sa Barangay Campo 7, Lungsod sa Minglanilla, habagatang Sugbo.
Ang kanding maoy natusak sa mga bala sa kalibre .45 nga pistola.
Kini ang gibutyag ni Romeo Panacine, 30, taga Barangay Tutay, Lungsod sa Pinamungahan, dihang gikuhaan og pamahayag ni Police Staff Sergeant Retchel Antipuesto, imbestigador, sulod sa tambalanan diin siya gidala.
Si Antipuesto nga nahinabi sa Superbalita Cebu nagkanayon nga si Panacine nibutyag nga kon wa pa ang kanding nga apil siya nga nakalas.
“Naluwas daw siya sa kanding nga karga sa likod gisulod sa sako kay nakaali man. Maoy natusaktusak sa bala sa kalibre .45,” dugang ni Antipuesto.
Ang kanding usa lang sa iyang mga karga. Naa pa siyay kargang manok himongaan, gawas sa mga baligyaon nga wa maunsa atol sa pagpamusil.
Human matapsingi ang iyang lubot sa bala, natumba siya, apan daling nakadagan ngadto sa kabalayan.
NAAGIAN
Sumala pa ni Panacine nga nakit-an niya ang mga killer nga nag-park sa ilang motorsiklo nga nag-atang sa may karsada sa Manipis.
Sa ilang paglabay, gisundan dayon sila sa upat ka mga killer nga nagsakay sa duha ka mga motorsiklo, usa niini Nmax.
Sa ilang pag-abot sa may man-made forest, kalit nga gipusil si Ryan Magtagad ug gisunod siya, apan nakahupo.
Sumala ni Panacine nga gisingitan pa niya ang gunman nga “Ayaw ko apila, Boss! Wala koy labot,” apan padayon siyang gipusil hangtod nga siya natumba.
Siya nakapangayo og panabang sa mga tawo sa dapit.
Si Panacine niklaro nga wa silay gikaaway, naglibog siya kon nganong sila gipamusil.
Apan si Antipuesto nagduda kon nagsulti ba sa tinuod si Panacine kay klaro nga naa pa kini sa kahadlok.
Sa ilang nakuhang impormasyon gikan sa mga pamilya, buotan ang mga biktima.
Wa isalikway sa kapulisan ang posibilidad nga may kalambigitan sa ilang negosyo ang kremin o kaha naalaan silang mga asset sa kapulisan.
“Basin ba sa ilang negusyo kay buy-and-sell, unya ipautang nila sa mga tawo sa bukid. Duna siguro wala makabayad. Basin nakalalis,” matod ni Antipuesto.
Nakuha sa closed circuit television (CCTV) ang paggukod sa mga killer kang Panacine.
Apan di maklaro kay layo ang kuha kay ingon sa nakabantay ang mga killer nga dunay CCTV sa barangay hall.
Ang napagan nga si Romualdo Liones, mekaniko, naoperahan na, apan komplikado ang kahimtang kay bag-o pa na stroke.