Gitudlo nga hinungdan sa grabeng kahuot sa trapiko sa lungsod sa Consolacion ug Dakbayan sa Mandaue mao ang excavation sa Metropolitan Cebu Water District (MCWD) nga nag-ayo sa water pipe nga nagtulo.
Gitabunan na ang gikawot nga dapit sa karsada alas 7 sa gabii sa Huwebes, Hunyo 17, 2021 ug giablihan na og balik ang lane nga apektado sa alas 8 sa gabii.
Sa text message ni Consolacion Mayor Joannes Alegado, matod niya nga iyang gihangyo ang MCWD nga paspasan ang ilang trabaho sa pag-ayo sa buslot nga tubo nga nakaputol sa supply sa tubig sa ilang lungsod.
Gani, sigon niya nga ang municipal engineering department ug Consolacion Traffic Enforcement Team nag-atang sa mga contractor aron paspasan ang ilang trabaho.
Tungod sa pagkubkob, nakamugna kini og kahuot sa dalan ug hinay nga dagan sa trapiko tungod kay usa na lang ka lane ang maagian.
Sa text message ni Edwin Jumao-as, executive director sa Traffic Enforcement Agency of Mandaue (Team), sigon niya nga ang hinay nga pagdagan sa mga sakyanan paingon sa norte diin masangit sila sa may Consolacion hangtod sa Dakbayan sa Mandaue, nagsugod pa niadtong Hunyo 10, 2021.
Dili lang ang Consolacion ang nakasinati og hinay nga dagan sa trapiko, lakip na sab ang Mandaue. Niadtong miaging semana, sigon ni Jumao-as nga nakasinati sab og paghinay sa dagan sa trapiko, apan magsugod kini sa alas 5 sa hapon ug alas 8 sa gabii moluag na.
Apan, sa usa ka semana nga gitrabaho ang water pipe, ang nahitabong trapik niadtong Hunyo 17 ang kinagrabehan.
Matod niya nga nagsugod og kaungot ang mga sakyanan paingon sa norte gikan sa alas 3 sa hapon hangtod na sa alas 9 sa gabii. Gani, ang trapik nagsugod sa atbang sa SM Consolacion paingon na sa Pacific Mall sa Mandaue.
Matod ni Jumao-as nga ang dagan sa trapiko sa Mandaue paingon sa Consolacion nibalik na sa normal niadtong Hunyo 18 sa gabii. Niingon sab si Mandaue City Councilor Jimmy Lumapas, chairman sa committee transportation nga nga naabot ang traffic paingon sa Barangay Canduman, Dakbayan sa Mandaue.
Tungod kay naungot ang mga sakyanan sa highway sa Barangay Canduman, ang access road niini sa H. Abellana paingon sa Tintay nakasinati sab og heavy traffic. / KFD