Magtiayong gituohang gitulis nakaplagang patay mga alas 7 sa Biyernes sa gabii, Hunyo 18, 2021 sa Barangay Tananas, San Fernando, habagatang Sugbo.
Si Police Major Eduard Sanchez, kanhi nadestino sa Cebu City Police Office, human nasayod nga dunay nakaplagang sakyanan sa San Fernando nga nitukma sa pick-up truck sa iyang igsuon, daling niadto sa dapit ug nikompirma nga kini mao ang iyang igsuon nga si Gavino Sanchez, liaison officer sa Department of Education (DepEd) sa Minglanilla ug asawa niini nga si Arlene, maestra sa Tobod Elementary School sa Minglanilla.
Ang magtiayong Sanchez napalgan sulod sa ilang sakyanang Mitsubishi Strada pick-up sa mga lumolupyo sa dayon nang gabii sa Biyernes.
Giingong tulo na ka mga adlaw nga nahanaw ang magtiayon.
Ang magtiayong Sanchez gidagit sa armadong mga tawo nga nagsakay usab og pick-up truck mga alas 4 sa hapon niadtong Miyerkules, Hunyo 16, 2021.
Apan ang mga anak wa pa masayod nga gitulis ang ilang mga ginikanan hinungdan nga wa dayon makataho sa kapulisan sa Minglanilla.
Ang sakyanan sa magtiayon nabantayan na sa mga lumolupyo nga nagtuo lang nga gi-park sa bungtod sa Tananas.
Apan nakuryuso sila kay wa na kini mobiya sa dapit hinungdan nga ilang gilili.
Nakit-an ang magtiayong Sanchez nga diha sa backseat sa pick up truck nga patay ug nanimaho na./GPL