Nakalihay ang Philadelphia Sixers sa sayong pagbakasyon human kini makaipsot sa uwahing rally sa Atlanta Hawks pinaagi sa 104-99 nga kadaugan sa Game 6 sa Eastern Conference semifinals sa State Farm Arena kaganiha, Biyernes sa gabii (Sabado sa Pilipinas).
Kini bisan pa man sa 34 puntos ni Trae Young kinsa mipakatap usab og 12 ka assists alang sa Hawks.
Sa kadaugan, ang series motapon og balik sa Wells Fargo Center sa Philadelphia karong Dominggo (Lunes sa Pilipinas).
Ang panaghugpong nila ni Joel Embiid, Tobias Harris ug Seth Curry kinsa nagkumboya og 70 puntos ug 21 ka rebounds maoy nagbaliwala sa gipakitang kahanas ni Young kinsa nakapabuto og lima ka tres, usa niini diha na sa himatyong minutos nga maoy naghatag sa 94-93 nga pagpanghudlat.
Si Curry ug Harris pulos mipakli og tag 24 puntos samtang si Embiid midugang og 22 nga may 13 ka rebounds.
Apan nainat og balik sa Sixers ang labaw pinaagi sa free throws ni Embiid ug sa tagsa ra magamit nga si Tyrese Maxey kinsa nakahagpat og 16 puntos.
Misuway na usab sa paggukod ang Hawks sa dihang mipahagsa si Danilo Gallinari sa iyang kaugalingong tres aron pagpakubol sa labaw ngadto sa tres puntos nalang, apan ang Sixers maampingon nga miprotehir niini ginamit ang free throw line. (JBM)