SUPERBALITA CEBU

Sa unang higayon, Clippers nakasulod sa West finals; gitaktak ang Jazz sa Game Six

MANN IS THE MAN. Si Terance Man sa Los Angeles Clippers ang sulagma nga nahimong top scorer sa ilang kadaugan batok sa Utah Jazz sa Game 6 sa Western Conference semifinals series. Ang tulo pa lang ka tuig sa NBA mipaksit og 39 puntos. (AP)

Sa unang higayon sulod sa 51 ka seasons nakaabante na gayud ang Los Angeles Clippers sa Western Conference finals sa dihang ilang gipukan ang Utah Jazz, 131-119, sa Game Six sa ilang semifinals series kaganiha, Biyerne sa Amerika (Sabado sa Pilipinas).

Kini bisan pa man og wala ang ilang star player nga si Kawhi Leonard kansang tikod naangol sa Game Four.

Ug sa kadaugan, ikasangka sa Clippers ang nagpaabot nga Phoenix Suns sa Western Conference finals series nga sugdan sa Dominggo (Lunes sa Pilipinas).

Sa wala damha, si Terance Mann kinsa na-draft sa Clippers niadto pa lang 2019, maoy nakapakita og igong suporta sa opensa sa Los Angeles human kini mipahagsa og 39 puntos nga gibuwakan og pito ka triples,

Si Paul George milanit og 28 puntos ug siyam ka rebounds sulod sa 45:30 segundos samtang maayo usab nga nakaduwa ang laing beterano nga si Reggie Jackson nga may 27 puntos.

Gibiyaan og 25 puntos ang Clippers sa sayong bahin sa third quarter sa wala pa kini mo rally. Kini maoy ikatulong higayon nga ang Clippers gibiyaan og kapin sa 22 puntos apan nakabangon ug midaog sa duwa.

Sa rally, si Mann kinsa nag-average lang og 4.6 points sulod sa 12 ka duwa, mikadlit og 20 puntos sa third canto.

Ang Utah nagpabilin nga labaw, 94-91, padulong na sa fourth quarter. Ang layup ni Jackson sa sayong bahin sa fourth maoy naghatag sa unang labaw sa Clippers, 96-95, 10:36 segundos ang nahabilin sa duwa.

Gikan niini, hugot nga nagbinayloay sa ilang opensa ang matag habig apan sa naghinapos nga bahin, gilupig sa lahutay ang Jazz kinsa nakahagpat og 39 puntos gikan ni Donovan Mitchell.

Si Royce O'Neal ug Jordan Clarkson tagsatagsang mipugnit og 21 puntos.

Sa kasaysayan sa prankisa sa Clippers, si Mann mao pay bugtong nilang player nga naka-score og 20 puntos o kapin sulod sa usa ka quarter sa playoffs. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph