Clippers vs Suns sa W-Conference finals

Sa unang higayon sulod sa 51 ka seasons nakaabante na gayud ang Los Angeles Clippers sa Western Conference finals sa dihang ilang gipukan ang Utah Jazz, 131-119, sa Game Six sa ilang semifinals series Biyernes sa Amerika (Sabado sa Pilipinas).

Kini bisan pa man og wala ang ilang star player nga si Kawhi Leonard kinsang tikod naangol sa Game Four.

Sa kadaugan, ikasangka sa Clippers ang nagpaabot nga Phoenix Suns sa Western Conference finals series nga sugdan karong Dominggo (Lunes sa Pilipinas).

Sa wala damha, si Terance Mann kinsa na-draft sa Clippers niadto pa lang 2019, maoy nakapakita og igong suporta sa opensa sa Los Angeles human kini nipahagsa og 39 puntos nga gibuwakan og pito ka triples,

Si Paul George milanit og 28 puntos ug siyam ka rebounds sulod sa 45:30 segundos samtang maayo usab nga nakaduwa ang laing beterano nga si Reggie Jackson nga may 27 puntos.

Gibiyaan og 25 puntos ang Clippers sa sayong bahin sa third quarter sa wala pa kini mo rally. Kini maoy ikatulong higayon nga ang Clippers gibiyaan og kapin sa 22 puntos apan nakabangon ug midaog sa duwa.

Sa rally, si Mann kinsa nag-average lang og 4.6 points sulod sa 12 ka duwa, nikadlit og 20 puntos sa third canto.

Ang Utah pabilin nga naglabaw, 94-91, padulong na sa fourth quarter. Ang layup ni Jackson sa sayong bahin sa fourth maoy naghatag sa unang labaw sa Clippers, 96-95, 10:36 segundos ang nahabilin sa duwa.

Gikan niini, hugot nga nagbinayloay sa ilang opensa ang matag habig apan sa naghinapos nga bahin, gilupig sa lahutay ang Jazz kinsa nakahagpat og 39 puntos gikan ni Donovan Mitchell.

Si Royce O’Neal ug Jordan Clarkson tagsatagsang nipugnit og 21 puntos.

Sa kasaysayan sa prankisa sa Clippers, si Mann mao pay bugtong nilang player nga naka-score og 20 puntos o kapin sulod sa usa ka quarter sa playoffs. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph