Migallen: Si Baldwin ug kadaugan sa Gilas vs. Korea

Migallen: Si Baldwin ug kadaugan sa Gilas vs. Korea

Dili komportable si Gilas Pilipinas coach Tab Baldwin sa pamahayag ni South Korean coach Cho Sang Hyun nga mihulagway sa ilang kadaugan niadtong Miyerkules nga taghap o lucky shot sa nagpadayon nga Third window sa 2021 Fiba Asia Cup qualifier sa Angeles Foundation University Gym.

Sa usa ka interview, gipasabot ni Cho nga wa silay nahimo aron kini mapugngan kay wala man kini nila damha.

“There is no space for taking a shot. It was a lucky shot. There was nothing we can do to fix it,” ni Cho pa pinaagi sa interpreter.

Sa iyang interview, si Baldwin namahayag sa mga reporter nga ang play nga iyang gidesinyo dili para ni SJ Belangel. Ingon niya nga ang una niyang option mao ang Sugboanon nga si Carl Tamayo.

Ang ang 6-8 nga Tamayo wa kaipsot sa depensa sa import sa Korea nga si Ricardo Ratliffe ug wa usab maka-execute makadagan sa sentro si Ange Kouame nga mao unta ang second option.

Tungod niini, ug aron dili matawagan og five-second violation, ang nag-inbound nga si Dwight Ramos napugos sa pagpasa sa bola ngadto ni Belangel kinsa na out-balance sa three-point area nga sa samang higayon namahala sa pag-itsa nga nadungan sa pagkapupos usab sa oras.

Swak ang tres ni Belangel kinsa gihangop sa iyang mga kauban diha tunga sa korte nga nagselebrar sa kadaugan.

Dili iyang play, dili siya designated shooter sa team, na outbalance sa pag-itsa, unya na syat. Dili diay ni lucky shot, na ug sa binisaya pa nataghapan?

Dili ko moingon nga kadto taghap kon si Belangel perming moitsa og ingon ato ka lisod unya permi sab nga ma syat.

Sakto si Cho sa iyang pamahayag ug way rason nganong si Baldwin masuko.

Way dautan kon angkunon niya nga taghap ang ilang kadaugan, apan iyang ipamatuod nga wala magsalig og taghap ang Gilas pinaagi sa pagproyba karong adlawa, Dominggo, sa dihang ilang ika-rematch ang South Korea sa alas tres ang takna sa hapon.

Ang kadaugan sa Gilas otomatikong makapapas sa pagduda sa kapabilidad niini, apan ang kaparutan maghatag og kahulogan. (jun.migallen22@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph