Nibisita ang among kanhi mga kauban sa newsroom nga sila si Liberty ug Rianne nga nangaungo na sa biseklita. Nagsugodsugod na sila sa pagsikad og layo. Naghisgot sila og experience sa bikog, paspas sa pagsikad ug uban pa.
Ako silang gisultihan sa akong mga kasinatian kaniadto nga akong nakat-unan sa mga higala nga naa sa organized bike riding. Kay kuyaw ang pag bike, kinahanglan nga di magpataka, magpakusganay sa pagtungas, dulhog o kinakusgang motindak.
Una, kon mag bike, planoha ang rota, labina kon long ride. Kon sa karsada ra, pagsabot kon asa mag re group o pit stop aron adto magkapundok og balik. Di maayong magbiyaay kay sa pagsugod nagtapok gani, unya sa pagtunga-tunga magkatibuwaag na kay dunay gustong mo prove nga siya kusgan.
Kinahanglan nga mag buddy system. Di magbiyaay labina kon mag-inusara na lang ang usa kon naa sa kabukiran. What if dunay madisgrasya along the way unya wa siyay kauban? Mas grabe pa kon siya ang nauwahi sa grupo. Sama niadtong lima ka mountain bikers, ang usa nila nga nauwahi nabalitok, nagisi ang agtang.
Maayo gani kay diha siya nalamba sa residential area. Natabang ug nadapatan og first aid. Kaming grupo sa Sunstar mountain bikers ang ni escort niya padung sa ubos. Kon wa pa ang mga residente ug kami, naunsa na kaha to siya? Dinhi makita ang ka importante sa buddy system.
Kinahanglan nga dunay pacer ug sweeper. Ang pacer mao ang pinaka hinay sa grupo samtang ang sweeper ang pinaka kusgan. Nganong ingon ani man? Tungod kay aron ang kinahinayan di mabiyaan. Wa say mabiyaan sa rest of the group kay siya na gud ang kinahinayan. Ang labing kusgan maoy sweeper kay kon dunay mabitay, iyang maubayan. Ang labing kusgan mao ang dunay kapabilidad sa pag-agad-agad sa mabitay.
Kinahanglan nga fully charged ang cell phones panagana sa mga emergency. As much as possible, kinahanglan nga ang rota dunay signal. Apan kon wa gani, sa ako nang gikaingon, dinhi di magbiyaay ang grupo. Hinumdoman kanunay ang buddy system.
Pagdala og identification (ID) card nga naa ang imong blood type ug emergency number nga matawgan. Panagana kini kon simbako madisgrasya ka unya nagkinahanglan ka og blood transfusion. Kinahanglang matawgan ang imong kabanay aron mapahibawo.
Timan-i kanunay nga kon leisure biking ang imoha, ang pag enjoy ang imong tumong, di ang pakiglumba. Busa, ayaw paggara-gara aron lang imatuod nga ikaw kusgan. Huna-hunaa nga ikaw ug imong mga kauban ma-enjoy sa ride. Mao na ang labing importante. Ang pagsikad gawas sa tournament usa ka enjoyment. Way malingaw sa hambogero.