Opisyal nang gianunsyo ni Mexican-American boxing legend Oscar De La Hoya nga mobalik siya’g away karong Septiyembre 11, 2021 sa Las Vegas batok sa kanhi UFC champion nga si Vitor Belfort.
Wala man tuod gisulti sa 48 anyos nga si De La Hoya apan gituohan nang daan nga usa ka exhibition bout ang sagubangon sa gitawag og Golden Boy sa kalibutan sa boksing.
Ang mga exhibition matches sa boksing nauso na karon sanglit gipasiugdahan kini ni Floyd Mayweather Jr., ug ni Mike Tyson sa ilang nangaging mga duwa. Ang pagbalik og away ni De La Hoya gisuportahan sa Triller, nga usa ka social networking service nga niambak ngadto sa pagpahigayon og combat sports promotions sa nangaging katuigan.
Ang Triller maoy promoter sa nagmalampusong exhibition fight nila ni Mike Tyson ug Roy Jones Jr. lakip na ang panagsangka nila ni YouTube star Jake Paul batok mixed martial arts (MMA) fighter Ben Askren.
Si Belfort, 44, katapusang miaway sa UFC niadtong pang 2018. Sa iyang bahin, si De La Hoya katapusang miaway niadto pang 2008 diin misunder siya sa 8th round sa ilang away ni Filipino boxing icon Manny Pacquiao. (ESL)