Espesyal sa iyang mga anak ug mga apo si Nanay Lilia Maratas.
Hinungdan nga giplanohan ug giandaman kini nila og usa ka adlaw nga salosalo ug panag-inambitay alang sa iyang espesyal nga adlaw.
Niadtong Hunyo 9, 2021, gisaulog ni Nanay Lilia ang iyang ika-75 birthday.
Tungod kay adlaw tingtrabaho man, ang kasaulogan nauswag og gamay niadtong Hunyo 12, atol usab nga gisaulog sa nasod ang Independence day.
Matod ni John Fredson Granada, usa sa mga apo ni Nanay Lilia, pinangga kaayo nila nga mga apo ang ilang Nanay Lilia, hinungdan nga nigahin gyud sila og oras alang sa espesyal nga okasyon. Kadtong naa nanarbaho sa mainland Cebu labi na sa siyudad sa Sugbo, tuyo gyud nga nipauli sa lungsod sa Tudela, isla sa Camotes, diin namuyo ang ilang pamilya, aron moduyog sa kasaulogan sa birthday sa apohan.
Alang nila, usa ka milestone nga makaabot sa maong panuigon ang ilang lola.
Nag-amot-amot sila alang sa mga pagkaon nga gisaw-an. Nagpalit sila og usa ka buhing baboy nga ilang gilapa ug gibahinbahin alang sa mga sud-an nga giluto.
Ang kasaulogan gihimo sa Heminsulan Beach sa lungsod sa San Francisco, isla sa Camotes.
Sumala ni John, relihiyuso ug diyosnon ang iyang apohan, inahan sa iyang inahan nga si Fredelia, hinungdan nga sa wala pa sila moadto sa dagat, nihapit una kini sa simbahan aron mag-ampo ug magpasalamat sa dugang katuigan sa kinabuhi ug sa mga gasa sa maayong panglawas ug pamilya.
Apil sa ilang gisaw-an nga mga pagkaon ang lechon belly, humba, ginamay, pancit, humba nga nangka, biko ug cake. (SCG)