SUPERBALITA CEBU

Mongaya: Morisgo tungod sa politika

Panahom

Atong nabantayan nga nidaghan karon ang nakauyon sa pagsupak ni Gob. Gwen Garcia sa mga health protocol nga gilagda sa Inter-Agency Task Force sa Mactan-Cebu International Airport (MCIA).

Naay gipakita si Gob. Garcia nga mga pruweba nga maayo pagkadumala ang kahimtang sa Covid-19 sa Sugbo ug panahon na nga dili lisudlisoron ang mga overseas Filipino workers (OFW) ug returning overseas Filipinos (ROF).

Atong mabasahan sa Facebook nga ubay-ubay ang moingon nga makabawos ra man ang mga Sugboanon karong umaabot sa piliay.

Bisan pa man, niinsister ang Malakanyang nga tumanon ang mga lagda sa IATF. Akong nasabtan nga nabalaka kini sila nga makasulod sa nasud agi sa MCIA kining giingong nga Delta variant. Mao kini ang mas kuyaw nga variant sa Covid-19 nga maoy nakapalukapa sa health system sa India.

Naa ganiy balita nga gatosan sa mga doctor sa Indonesia ang nataptan niining giingong nga Delta variant.

Tungod niini, nahibulong ko nganong kumpyansa kaayo ang mga Sugboanon sa maong kakuyaw. Nganong irisgo man gyud ang panglawas sa katawhan tungod lang sa politika?

Masuko?

Nahibong ko nganong daghan ang nasuko nga nisaad kuno si Sen. Manny Pacquiao kon siyay presidente nga masulbad ang kakulang sa mga balay alang sa mga kabus. Ngano kunong mosaad nga di man na matuman?

Di ba angay lang masuko kon si Pacquiao gihatagan og kahigayonan nga mapresidente pero wala makatuman sa saad?

Daghan bitaw ang saad nga tiwason sa administrasyon ni Presidente Duterte ang pagtukod og balik sa Syudad sa Marawi apan hangtod karon wala pa matuman. Pero duna bay nanaway kaniya?

Kon buot hunahunaon ra ba, natinuod ang mga gipangsaad ni Pacquiao nga mga housing projects didto sa Sarangani. Kini lang gyung atong mga kaigsuonan nga awtomatik ang sukosuko bisan wala sa lugar ang rason.

Kang Leni

Nagpalapad na karon sa ilang han-ay ang Leni: Tanging Pag-asa 2022. Grupo kini sa mga kanhi aktibista nga karon nag-awhag kang Bise Presidente Leni Robredo nga modagan sa pagka presidente.

Alang sa gustong mo-coordinate kanila, mahimong ma-kontak silang Noel Tabasa ug Atty. Ed Lao. (DM nako sa @anol_cebu)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph