Sa nanglabay nga mga buwan, pwerteng saka sa mga kaso sa coronavirus disease 2019 (Covid-19) sa National Capital Region (NCR) ug kanait nga mga lalawigan hinungdan nga gipailawom og balik sa enhanced community quarantine (ECQ), labing higpit nga quarantine level, sa hinapos nga bahin sa Marso ug sayo sa Abril.
Milurang lurang tuod ning nakalabay nga mga semana, apan taas gihapon itandi sa mga kaso sa Metro Cebu. Hayan, ang kalainan sa mga lakang sa mga first generation contact sa mga nataptan sa Covid-19 maoy hinungdan nga managlahi ang sitwasyon sa duha ka mga metropolis.
Dinhi sa Sugbo, ubos sa giya sa kagamhanan, medical experts ug pribadong sektor, ang tanang 1st generation contacts sa gi-Covid gipailawom sa swab test ug I-isolate og una sa balay. Kon positibo ug asymptomatic, i-isolate diretso, gawas sa talagsaong mga kaso, diin gitugot lang ang home isolation.
Diha pay higayon nga bisan ang 2nd ug 3rd contacts giapil pa sa Dakbayan sa Sugbo sa pag swab test.
Kini nga protocol mas estrikto kay sa gipatuman sa Inter-Agency Task Force (IATF) for the Management of Emerging Infectious Diseases, diin ang 1st contact generation i-assess kon angay bang i-swab ug i-isolate. Mao kini ang gisunod sa Metro Manila ug ubang mga dapit sa nasod.
Kini nagpakita nga di lang kay sa health protocol sa mga overseas Filipino workers ug returning overseas Filipinos (ROF) nagkalahi ang National IATF ug Sugbo.
Kon tan-awon ang kahimtang sa mga pagpanakod sa Covid, hain kaha ang mas epektibo, ang higpit nga contact tracing, isolation ug treatment sa Sugbo o ang gisunod nga protocol sa ubang mga dapit sa nasod nga iya sa IATF?
Ang kahimtang sa pagpanakod ug mga pamaagi sa pagpugong makita man kon ang gidaghanon basehan. Gawas kon piyungan lang kay di makadawat nga mas epektibo ang iya sa Sugbo.