Namatay ang amahan sa mga Quisumbing nga si Dr. Norberto Quisumbing Jr. niadtong Biyernes, Hunyo 18, 2021.
Si Quisumbing usa ka business icon, nagtukod sa Norkis Group of Companies ug Q-Park. Siya sab ang 90-anyos nga apohan ni former Mandaue City Mayor Luigi Quisumbing.
Gianunsyo ang kamatayon ni Quisumbing sa iyang kanhi consultant nga si Edward Ligas sa usa ka Facebook post niadtong Biyernes.
Nipadayag si Ligas sa iyang simpatiya ngadto sa pamilya ni Quisumbing.
Gawas ni Ligas, mipadayag sab si Mandaue City Mayor Jonas Cortes sa iyang simpatiya ug pahasubo ngadto sa pamilya ni Quisumbing.
Matod ni Cortes nga ang kontribusyon ni Quisumbing sa business sector ug sa commerce sa dakbayan nagpadayon gihapon og kuyanap sa tibuok dakbayan.
“I am honored and blessed to have known him personally. He was truly a blessing in my life and to everyone that knew him, with his passing, we surely miss him. We will never forget his kindness. May God give him eternal rest and the family the strength to bear great pain,” sigon ni Cortes.
Sa post sab ni Andy Sevilla, bise presidente sa Metro Manila Turf Club, usa sab sa gitukod ni Quisumbing, nga ang business icon naghandom na nga makagawas human nga makadawat kini sa second dose sa iyang bakuna, duha ka semana kapin na ang milabay. / KFD
Apan, niadtong Hunyo 18, 2021 samtang nagtan-aw si Quisumbing og TV, kalit lang kini nga naglisod og ginhawa.
Gidala siya sa hospital apan gideklara nang dead-on arrival.
Giklaro ni Sevilla sa iyang Facebook post nga wala nagpositibo si Quisumbing sa Covid-19 virus.
Matod sab niya nga gihaya si Quisumbing sa The Chapels (Garden Wing Chapel 1) sa Heritage Park sa Fort Bonifacio sa Taguig City.
Ang viewing nagsugod alas 10 sa buntag hangtod sa 8 sa gabii sa Sabado, Hunyo 19 ug gimisahan alas 7 sa gabii.
Sa Dominggo, Hunyo 20, magpadayon gihapon ang viewing hangtod sa iyang cremation schedule alas 3 sa hapon. (KFD)