Ang Cebu City Government nag-target sa pagbakuna sa mayoriya sa mga residente nga nagpuyo sa mga bukirang barangay sa Septiyembre.
Ang Siyudad nagsugod sa pagpamakuna sa mga residente sa bukirang mga barangay sa Biyernes, Hunyo 18, 2021.
Duha ka vaccination sites sa siyudad ang gibuksan alang sa mga residente sa mga bukirang dapit-Don Bosco Technical College sa Barangay Punta Princesa nga gibuksan sa Hunyo 18 ug barangay gym sa Bonbon nga gibuksan sa Hunyo 19.
Ang DBTC alang sa mga residente sa Barangays Buhisan, Toong, Pamutan, ug Sapangdaku, samtang ang barangay gym sa Bonbon alang sa mga residente sa Bonbon, Babag, Pung-ol Sibugay, Sudlon 1, Sudlon 2, Buot Taup, ug Malubog. Si Cebu City Acting Mayor Michael Rama niingon nga ang mga bukirang barangay prayoridad, labina sa Sinovac vaccine.
“Ang tibuok mountain barangays, among gi-foresee... we wish by September, will be able to, hopefully, really saturate the mountain barangays,” matod ni Rama sa interview sa Hunyo 19.
Ang Siyudad nigamit sa Sinovac vaccines alang sa mga bukirang barangay kay ang mao nga brand mas sayon ibiyahe. Si Rama niingon nga kon dunay bag-ong moabot nga Sinovac vaccines, magreserba ang Siyudad alang sa mountain barangays. (JJL)