Di mominos sa 13,000 ka tonelada nga basura nakolekta atol sa clean up activity nga gipahigayon sa Hunyo 19, 2021 sa nagkalain-laing sapa ug coastal areas sa dakbayan sa Sugbo.
Matod ni Cebu City Coastal Management Task Force (CMTF) subcommittee chairperson Reymar Hijara nga kadaghanan sa nakolekta nga basura mga plastik.
Gibana-bana nga 78 ka porsyento sa basura mga plastik.
Uban nga basura nga nakolekta mga papel (4.8 percent); kahoy (7 percent); metal (2.6 percent); glass (2 percent); ug 14 ka porsyento nga lain pang klase sa basura.
Ang kalihukan kay gilangkuban sa 3,800 ka volunteers nga gikan sa nagkalain-laing ahensya ug organisasyon.
Ang mga lugar nga apil sa gilimpyohan mao ang Mahiga Creek duol sa Innodata; Kamputhaw River sa may Tinago-Tejero Bridge; Kamputhaw River sa may T. Padilla nga merkado; Ermita Coast; ang gawasan sa Guadalupe River; Guadalupe River duol sa Pahina San Nicolas Barangay Hall; laing parte sad sa Guadalupe River duol sa University of San Carlos (USC)-South sa Sambag 1; Kamputhaw River sa Sudlon Bridge; Arabal River duol sa Kinalumsan Bridge sa Mambaling; parte sa Kinalumsan River duol sa Tisa Elementary School; South Road Properties (SRP) tower; ug sa baybayon sa Il Corso.
Butyag ni Hijara nga ang sunod nga clean up activity ipahigayon sa Septiyembre.