Mokabat sa P10 milyones nga cash ug mga alahas ang nadala sa mga tulisan nga nipatay sa managtiayong taga Minglanilla nga napalgan sulod sa ilang sakyanan mga alas 7 sa Biyernes sa gabii, Hunyo 18, 2021 sa Barangay Tanañas, lungsod sa San Fernando.
Ang magtiayon gidagit sa armadong mga tawo niadtong Miyerkules, alas 4 sa hapon, Hunyo 16, 2021, apan wa dayon ma-report.
Si Police Major Eduard Sanchez, manghod sa biktimang si Gavino, 49, nga nahinabi sa Superbalita Cebu, nagkanayon nga sa kuwentada sa ilang pamilya, mokabat sa P10 milyones ang nadala sa armadong mga tulisan nga naglakip sa cash sa vault nga P5 million, mga sensilyo gikan sa negusyong tubig sa magtiayon ug mga alahas.
Nianang mga alas 10 sa gabii sa Miyerkules, si Gavino nauli sa ilang balay sa Tobod nga nagdali, matod sa usa sa mga anak nga niasoy ngadto kang Eduard.Igo ra kining nikuha sa kuwarta ug mga alahas, daling nilakaw.
Nadunggan pa sa anak ang ilang inahan nga si Arlene, 47, magtutudlo sa Tobod Elementary School sa Barangay Tobod, Minglanilla nga nisangpit nga padalion ang ilang amahan.
Sukad niadto, wa na sila masayod diin na ang ilang mga ginikanan.