SUPERBALITA CEBU

P10M nakuha gikan sa magtiayong gipatay

Mokabat sa P10 milyones nga cash ug mga alahas ang nadala sa mga tulisan nga nipatay sa managtiayong taga Minglanilla nga napalgan sulod sa ilang sakyanan mga alas 7 sa Biyernes sa gabii, Hunyo 18, 2021 sa Barangay Tanañas, lungsod sa San Fernando.

Ang magtiayon gidagit sa armadong mga tawo niadtong Miyerkules, alas 4 sa hapon, Hunyo 16, 2021, apan wa dayon ma-report.

Si Police Major Eduard Sanchez, manghod sa biktimang si Gavino, 49, nga nahinabi sa Superbalita Cebu, nagkanayon nga sa kuwentada sa ilang pamilya, mokabat sa P10 milyones ang nadala sa armadong mga tulisan nga naglakip sa cash sa vault nga P5 million, mga sensilyo gikan sa negusyong tubig sa magtiayon ug mga alahas.

Nianang mga alas 10 sa gabii sa Miyerkules, si Gavino nauli sa ilang balay sa Tobod nga nagdali, matod sa usa sa mga anak nga niasoy ngadto kang Eduard.Igo ra kining nikuha sa kuwarta ug mga alahas, daling nilakaw.

Nadunggan pa sa anak ang ilang inahan nga si Arlene, 47, magtutudlo sa Tobod Elementary School sa Barangay Tobod, Minglanilla nga nisangpit nga padalion ang ilang amahan.

Sukad niadto, wa na sila masayod diin na ang ilang mga ginikanan.

GIPANID-AN



Gibutyag ni Eduard nga ang iyang maguwang, liason officer sa Department of Education (DepEd) sa Minglanilla, matag hapon maoy mokuha sa iyang asawa nga si Arlene nga maestra sakay sa ilang Mitsubishi Strada nga pick-up truck.

Nagtuo siya nga gipanid-an na sa mga tulisan ang routine ni Gavino ug Arlene matag adlaw.

Sa ilang nakuha nga closed-circuit television (CCTV) footage sa crossing sa Barangay Tubod, ang iyang maguwang nga nagmaneho sa itom nga Strada gigukod sa puti nga Nissan Navarra.

Sumala ni Police Major William Homoc nga duna na silay nakuha sa CCTV apan di maklaro ang plate number sa sakyanang puti sa mga tulisan.

Gisubay pa sa iyang mga sakop ang mga karsada sa dapit nga dunay CCTV sa pamasin makakita sila og footage nga magtabang sa pagsubay sa sakyanan.

“Amo sab susihon sa uban area, basin naay nakuhaan sa CCTV, kay sure ko gi-surviellance ni nila ang mga biktima” dugang ni Homoc. Si Homoc nga nahinabi sa Superbalita Cebu nagkanayon nga duna na silay mga testigos nga na locate.

Ila kining gihangyo nga moabag sa imbestigasyon, apan pulos pa nangahadlok.

Ang mga saksi nibutyag nga wala magtaptap ang mga armadong tawo.

Mahadlok sila kay gitiunan sab sila atol insedente hinungdan nga nagkatibuwaag silag panagan.

Nagtuo si Eduard nga nianang Huwebes sa kaadlawon, Hunyo 17, gipatay sila si Gavino ug Arlene kay dunay mga residente nga nakadungog og mga buto sa pusil sa dapit.

Nagtuo siya nga ang ni-withdraw og kwarta sa usa ka bangko sa Dakbayan sa Mandaue sa alas 10 sa buntag sa Huwebes di na ang iyang igsuon, kon di usa sa mga killer.

Sa iyang pag-abot sa crime scene, iyang nakita nga dunay samad pinusilan sa ulo si Arlene, apan wa na siya motan-aw pag maayo kay di siya makaako nga magsud-ong sa mga patay nga lawas sa magtiayon.

Sa pagsusi sa Superbalita Cebu, baho na ang lawas sa magtiayon nga gikuha sa mga Scene of the Crime Operation (Soco) personnel.

NANGAYOG ABAG



Si Eduard nangayog abag sa Anti-Kidnapping Group-Visayas Field Unit ug Cyber Crime Unit. Iyang ipasasusi sa Cyber Crime Unit ang social media sa iyang igsuon kay nasuta nila nga naka-online ang Facebook dihang nahanaw.

Si Lt. Zosimo Ravanes Jr., team Leader sa AKG7-VFU nga nahinabi sa Superbalita Cebu, nihulagway nga organisado ang grupo sa mga tulisan.

VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph