DUHA ang napatay samtang usa ang nasikop kinsa mga gituohang notadong drug pusher atol sa buy-bust operation sa hiniusang puwersa sa awtoridad alas 10 sa gabii, Hunyo 18, 2021, didto sa Chapter 9, Barangay Aplaya, Digos City, Davao del Sur.
Sa report gikan sa Police Regional Office-Davao Region nga duha ang napatay, usa ang nasikop ug mokabat sa P1.3 milyon nga shabu ang narekober.
Usa ka babaye ang nasikop samtang usa ka 30-anyos ug laing usa ang wa mailhi ang napatay kay giingong misukol sa awtoridad.
Sumala sa kapulisan nga taud-taod na nilang gipanubayan ang ilegal nga lihok sa mga suspetsado ug higayon nga nakigtransak na kini sa awtoridad nga maoy hinungdan sa ilang pagkasikop.
Gawas sa mga shabu, narekober sab ang usa ka .38 revolver, mga buhing bala, drug paraphernalia ug P1,760 nga cash.
Gipaneguro sa kapulisan sa Digos City nga masumpo gayod ang mga gituohang drug pusher sa siyudad.
Giandam na ang kaso nga ipasaka batok sa usa ka dinakpan samtang ang patay nga lawas sa duruha gipahiluna na sa ilang mga kabanay. (Jeepy P. Compio)