HUMAN gitangag sa iro ang tiil sa bata didto sa Purok 3, Barangay Gumalang, Baguio District, Siyudad sa Davao, Biyernes sa gabii, Hunyo 18, 2021, misugot na ang usa ka 15-anyos nga gituohang maoy nanganak sa dapit nga magpa-ospital.
Sabado sa buntag, gidala sa Southern Philippines Medical Center (SPMC) ang 15-anyos kinsa nagkadugo ug gituohang nakuhaan sa gisabak.
Sumala sa amahan sa 15-anyos nga dako iyang katingala nga sa pag-uli sa iyang anak gikan sa usa ka bakasyon, nanambok kini ug alegasyong nabuntis.
Mismong ang Barangay Gumalang ang miproseso sa pagpadala sa 15-anyos sa ospital diin sukad sa pagsuwat ning balita wala pa napagawas ang medical bulletin sa 15-anyos.
Una niini, nagkaguliyang ang mga nagpuyo sa lugar human nakuyawan ang nanag-iya sa iro nga nagtangag na kini og tiil diin abi nila’g tiil lamang sa manok.
Ang kapulisan sa Baguio Police Station sa pagpanguna sa station commander, Police Major Arquilles Bargio, padayong naghimo og imbestigasyon labot sa hitabo.