Gipakita sa Japanese champion nga si Naoya Inoue ang iyang kabangis human niya gipalukapa ang Filipino challenger Michael Dasmariñas sa ilang away didto sa Virgin Hotels, Las Vegas, Nevada kagahapon.
Gipahinumdoman ni Inoue ang boxing fans ngano gitawag siya sa alyas nga “Monster” pinaagi sa iyang mabangis nga performance aron madepensahan ang iyang World Boxing Association (WBA) ug International Boxing Federation (IBF) bantamweight titles.
Bisan paman sa iyang ka underdog niining awaya, wa mopakita og kahadlok ang Filipino boxer nga si Dasmariñas apan wa gyud siya makaporma sa undefeated fighter nga si Inoue.
Usa ka deadly liver blow ang mipatumba kang Dasmariñas sa third round. Nakabangon man tuod si Dasmariñas apan dali nga nakapagawas og laing body shot si Inoue og daling gihunong ni referee Russell Mora ang duwa.
Pinaagi sa usa ka translator, si Inoue miingon sa nga unang rounds iya pang gisukod ang kusog ni Dasmariñas. Human niadto, nakaingon si Inoue nga kaya niyang tumbahan ang kontra.
Nagpabiling way tatsa ang rekord ni Inoue sulod sa 21 ka away nga adunay 18KOs. Si Dasmariñas nahagba sa 30-3-1 rekord nga adunay 20KOs. (RSC)