NISAKA og P50mil ang makolekta sa Mandaue City Market Authority matag adlaw human giablihan na ang 24 ka gates sa Mandaue City Public Market.
Mipatuman si Mandaue City Mayor Jonas Cortes niadtong Hunyo 14 sa iyang Executive Order no. 18 nga ablihan na ang tanang gates sa merkado ug luagan na ang protocols nga gipatuman dinhi sama sa dili na pagpakita sa quarantine pass ug temperature check.
Matod ni Edgar Seno, pangulo sa Market Authority nga dako og kalamboan nga nahatag ang pag-abli sa tanang gates sa merkado labi na sa ilang kita.
Sigon niya nga niadtong ablihan lang nila ang pito ngadto sa 12 ka gates, makakolekta lang sila og P60mil ngadto sa P70mil.
Apan, sugod niadtong Hunyo 14, makakolekta na sila og P100mil ngadto sa P115 mil matag adlaw.
Ang maong koleksyon gikan sa matag adlaw nga renta sa stalls, utility bills sa stalls, ug parking fees. Gawas sa koleksyon, sigon ni Seno nga nisaka sab og 30 porsiyento ang foot traffic sa merkado, pasabot niini nga mas nanaghan ang mamalitay sa merkado.
Sa maong kalamboan, matod ni Seno, dili lang kini dakong tabang sa dakbayan, lakip sab ngadto sa mga tindera sa merkado.
Gani, nalipay ang mga tindera sa merkado sa maong kalamboan tungod niarang arang na ang ilang halin ug di na sila maglisod pagbayad sa ilang inadlaw nga renta.
Nanghinaot lang si Seno nga magpadayon ang ubos nga kaso sa Covid-19 sa dakbayan aron magpadayon usab ang pag-abli nila sa merkado.
Sa laing bahin, nagplano silang Seno nga magtukod og tricycle terminal sa eskina sa B. Ceniza St. ug P. Gomez St. aron palambuon sab ang transportasyon sa merkado ug makaagni og daghang pasahero nga mangompra sa merkado.
Gani, ang terminal makahatag sab og dugang koleksyon sa merkado tungod ang mga tricycle magbayad og terminal fee.
Apan, kini i-finalize pa nila sa Traffic Enforcement Agency of Mandaue (Team), sigon ni Seno. Tungod mas nidaghan na ang tawo sa merkado, giawhag sab ni Seno ang mga tindera nga magpabakuna aron mahatagan sila og proteksyon batok sa Covid-19.
Ang dakbayan nagsugod na sa pagpamakuna sa A4 priority sub group (ubang frontliner workers) ug A5 priority sub group (kabos).
Giawhag nila kini nga magparehistro na online aron mahatagan na sila og schedule kanus-a sila bakunahan. (KFD)