MOABOT sa 2,738 ka mga Oponganon ang gikatakdang makatrabaho sulod sa 10 ka adlaw sa programang Tulong Panghanapbuhay sa Ating Disadvantaged/Displaced Workers (Tupad) sa Department of Labor and Employment Dole 7.
Kini human nga si Kongresista Paz Radaza nakakuha og pundo nga maoy gamiton sa naasoyng programa hilabi na ning panahon sa pandemiya.
Nasayran nga moabot sa P11.57 milyunes ang gibubong pundo sa kongresista sa naasoyng programa.
Matag Oponganon, makatrabaho sa naasoyng programa sulod sa 10 ka adlaw diin gikatakda silang makadawat og P404 nga sweldo matag adlaw kun P4,040 nga sweldo.
Igo na kaayo kini sumala sa kongresita nga makasapar sa panginahanglan sa mga Oponganong hilabihan ka apektado niining nasinating pandemiya.
Niadtong Hunyo 15, 16 ug 18 gipahigayon ang orientation sa naasoyng programa sa 14 ka mga barangay sa mainland ug isla sa dakbayan nga mao ang Looc, Mactan, Talima, Poblacion, Marigondon, Gun-ob, Subabasbas, Tungasan, Pajac, Buaya, Canjulao, Pusok, Caubian ug Pangan-an.
Magsugod ang pagtrabaho sa mga benepisyaryo sunod semana diin ang sagad sa trabahuon nila mao ang paglimpyo sa mga purok ug sitio sa dakbayan.
Nanghinaot hinuon ang kongresista nga bisan og mapupos na ang 10 ka adlaw nilang pagtrabaho, motabang gihapon sila sa pagpabiling limpyo sa ilang tagsatagsa ka mga lugar sanglit alang man usab kini sa kaayohan sa tanan.
Niadtong Hunyo 18, mihatag usab sa Radaza og medical ug burial assistance sa 41 ka mga Oponganon pinaagi sa Department of Social Welfare and Development (DSWD) 7 nga mikabat ngadto sa P200,300.
“Sa kanunay ako nag-awhag sa mga Oponganon, nga kon dunay mga assistance nga inyong gikinahanglan, ayaw kamo sa pagduhaduha og bisita sa atong district office,” matod ni Radaza. (GCM)