NAKATULOG ang drayber samtang naghaguros sa iyang gimanihong awto hinungdang nakabangga kini og 5 ka sakyanan sa national highway sa Barangay Looc, dakbayan sa Danao, alas 3:25 sa kaadlawon sa Dominggo, Hunyo 20.
Nasikop sa ginukdanay sa kapulisan human ang drayber nisibat nga si Niño Bontilao Plaza, 27, dunay kapuyo ug taga Carajay, Barangay Gun-ob, dakbayan sa Lapu- Lapu, kinsa nagmaniho sa Toyota Vios.
Gipangdaro niya ang Isuzu Hilander nga gipanag-iya ni Judel Garcenila, Yamaha
Mio Aerox nga gipanag-iya ni Ronald C. Gomez, Yamaha Mio125 ni Irish S. Gomez, Rusi motorcycle ni William Hermoso Galo, ug Sunriser motorcyle nga gipanag-iya ni Ma. Normita Lao Gomez.
Sa imbestigasyon nila ni Police Staff Sgt. Jean Pierre Punay sa Danao Traffic Police, nagbutyag nga ang awto gikan sa Lapu-Lapu ug nagpadulong kini sa lungsod sa Catmon, dihang nakatulog sa pagmaniho si Plaza hinungdan nga iyahang gidaro ang mga sakyanan.
Nahitabo ang ginukdanay human nisibat ang suspetsado.
Ang suspek naabtan sa eskina sa Tupaz Street Brgy. Suba, Danao. Kasong reckless driving ug hit-and-run ang giandam sa kapulisan nga ipasaka batok sa suspetsado. (GPL)