SUPERBALITA CEBU

Editoryal: Basura

Editorial Art by Ariel Itumay

WA pa gyud ta maleksiyon bahin sa tukma nga paghipos sa atong basura. Dili ba kita lang gihapon ang mag-antos labi na sa panahon ning ting-uwan? Ang nagpun-og nga basura maoy kanunay mohatag og komplikasyon sa walay tino nga sistema sa drainage sa dakbayan sa Sugbo o tibuok Metro Cebu. Mosungsong o mobara kini sa kasapaan ug kanal. Ang resulta baha ug usahay dunay kinabuhi nga nakalas tungod sa trahedya nga ginama lang usab sa mga molupyo sa dapit.

Mabasol nato ang mga opisyal sa kagamhanan bahin sa walay tino nga inprastraktura sa drainage system. Pulos lang plano. Tagawtaw labi na sa panahon sa eleksiyon. Apan dili usab nato sila mabasol sa pagkatag sa basura nga binuhatan sa mga molupyo. Ang mga squatter nga nanagpuyo sa kilid sa mga sapa ug estero luoy apan dili nato mapihig sa pag-ila nga usa sila sa nakatampo sa dakong problema.

Ang resulta sa matag cleaning operation, mogawas gyud nga grabe gihapon ang pagpataka og labay sa mga basura sama sa upat ka oras nga clean-up drive sa dakbayan sa Sugbo niadtong Hunyo 19, Sabado. Dili mominos 13,000 tons sa mga basura nga nakuha gikan sa kasapaan ug mga kanal o estero sa dakbayan sa pagpangulo sa Cebu City Coastal Management Task Force (CMTF).

Si CMTF subcommittee chairperson Reymar Hijara nibutyag nga kadaghanan sa ilang nakolekta nga basura pulos plastic na sudlanan ug botilya nga 78 porsiyento sa nakuhang basura, gisundan sa mga papel, kahoy, metal, glass ug ubang matang sa basura.

Sa pag-edukar sa katawhan, wala magkuwang ang kagamhanan bahin sa insaktong paglabay sa basura ug ang paglusad sa programa nga pagbahig sa malata ug dili malata. Gani, dunay mga pakulo nga pag-ilis sa basura bugti sa pagkaon. Gahi lang kaha ang ulo? Kon dunay trahedya, basulon dayon ang kagamhanan kon dili dayon matabang? Dili kini makiangayon.

Ang kalimpiyo sa palibot kaakuhan natong tanan busa moabag kita sa kagamhanan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!