SUPERBALITA CEBU

Barrita: Face shields, ipasul-ob pa o di na?

Tikdul-tikdol

SI Cebu City Acting Mayor Michael Rama niingon nga wa kasabot ang kadaghanan kon unsay gamit sa face shields. “Daghan ang wala kasabot. Ang face shield himuon rag headband. Mao nay nahitabo sa face shield, honored in the breach than in the compliance,” matod pa niya.

Ang pangutana kon isul-ob pa ba o di ang face shields susama sa “To be or not to be?” sa “Hamlet” ni William Shakespeare. Pero ang paghimo sa face shield nga headband layo ra sa giingon ni Hamlet nga “a custom more honored in the breach than the observance.”

Mituman man gyud ang mga tawo sa pagsul-ob og face shield kay di man pasudlon sa mga establisemento kon wa niini. Kon wa sila kadala, dunay face shield nga baligya sa kilid. Pero kon nakasud na, tangtangon ug himuon na lang kining headband.

Uyon si Rama sa giingon ni Presidente Rodrigo Duterte nga ang face shields angay lang gamiton sud sa mga hospital. Ug matod pa niya, sagupon dayon sa siyudad sa Sugbo kon momando ang Inter-Agency Task Force (IATF) nga wa nay face shields sa gawas ug sud sa non-medical establishments.

Bitaw, unsa may kapuslanan sa pagsul-ob og face shield kon himuon lang kining headband? Ang Covid-19 virus giingon nga motakod agi sa baba ug ilong, sa mga pino kaayo ug di gani makitang pinisik sa laway nga atong mahanggap.

Si Rama niingon nga “very noble” ug “very practical” ang lakang sa presidente. Matod pa lagi ni Senate President Vicente Sotto III sa ilang tigum uban sa presidente, ang Pilipinas ra sa tibuok kalibotan maoy nagmando niining pagpasul-ob og face shields.

Balik ta sa pangutana kon pasul-ubon ba gihapon kita o di na og face shields human sa pahayag ni Presidente Duterte. Si Presidential Spokesman Harry Roque niingon nga taym sa. Klaruhon pa ni nato kay di ingon kasayon ang pag-usab sa lagda sa IATF.

Matod pa ni Roque, ang IATF mirekomendar ngadto sa presidente nga ipadayon ang pagsul-ob og face shields sa indoor spaces sama sa mga hospital, eskuylahan, commercial establishments, public transport, terminals ug mga simbahan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph