USA sa mga aktibo nakong higala sa Facebook subling nagpahinumdom sa atong dakong kaakohan sa atong kalikupan. Sa post sa iyang Facebook account niadtong Biyernes, gipakita ni Tata Alcantara Osorio ang nagpasad nga mga basura sa usa ka baybayon sa lungsod sa Dalaguete. Si Tata lumad sa nahisgutang lungsod, mao nga suhito siya sa panagway sa maong baybayon nga iyang gihulagway nga maoy ilang dulaanan sa karaang panahon. Kuyog ni Tata ang iyang trese anyos nga batang lalake.
Tungod sa kadaghan sa basura, nagtinabangay sila paghipos agi og pagpakabana nga maoy gikinahanglan karon batok sa nagkadaiyang hulga sa atong kalikupan. Matod ni Tata, naglabi sa mga basura nga nagpasad didto, naggikan sa mga tawo nga nangaligo ning maong baybayon nga gitawag og Tawi Tawi Beach. Nahimutang ni sa Barangay Poblacion, Dalaguete. Dili layo gikan sa munisipyo ug simbahang Katoliko.
Sa pangalan pa lang nga Tawi Tawi Beach, di malikayan nga mangangha ang makadungog. Nganong Tawi Tawi Beach? Unsay relasyon niini sa dapit nga gihinganlan og Tawi Tawi didto sa Mindanao? Si Tata may gipaambit nako nga kasayuran labot ning maong pangutana.
Sa mosunod nga mga adlaw, kini nga kasayuran maoy maggiya nako pagtugkad sa tinuod nga sugilanon sa Tawi Tawi. Ang importante ang karon nga kahimtang sa maong baybayon diin nagtipun-og ang daghang basura. Panawagan ngadto sa mga mangaligo sa Tawi Tawi Beach, palihug hunahunaon nato kanunay nga way sinuhulan didto nga maoy magsunod og hipos sa inyong basura. Hiposa ug dad-a sa inyoha ang inyong basura.
Ayaw pataka og labay nang inyong kinan-an, mga putos sa checheria, plastic bottle, panit sa puso ug uban pa nga nakahatag og dili maayong imahen sa maong dapit. Atong gihagit ang civic organizations, palihug iapil ninyo sa inyong taas nga kutay sa kalihukan ang pagpahibalik sa Tawi Tawi Beach ngadto sa iyang naandan nga panagway. Sa iyang post, gisugyot ni Tata ang kasamtangan nga pagpasira sa maong baybayon. Ug sama sa gihimo didto sa Boracay kaniadto, ipatuman ang lapad nga clean up drive sa dili pa kini ablihan og balik ngadto sa publiko.
Unsa may kapuslanan tuod nga magsigi og pakaligo kon ang mangaligoay ra sab ang magdala og dakong perdisyon sa baybayon. Sakto na nga sugyot, dili lang para sa Tawi Tawi Beach, apil na ang daghang baybayon nga gawas gilabayan og basura, gipanguhaan pa gyud og balas.
Kumusta ang inyong Father’s Day gahapon mga amahan? Nagpaabot ko nga maagi sa amoa si Marvin Dullo, ang tigpanuroy og isda sa among dapit. Ang akong tuyo mao ra unta ang pagtunol sa akong pasiunang pagtimbaya alang sa usa ka amahan nga human mawad-i og trabaho, nakigbugno sa hagit sa pandemiya pinaagi sa pagpanuroy og isda. Gawas sa isda, apil nga iyang gisuroy ang lamian nga biko.