Suns mibuntog sa Clippers sa Game One; Booker mipahagsa og 40 puntos

Si Devin Booker sa Phoenix Suns nga miitsa atubangan ni Marcus Morris Jr. sa Los Angeles Clippers niining aktoha atol sa Game One sa Western Conference finals. (AP)
Si Devin Booker sa Phoenix Suns nga miitsa atubangan ni Marcus Morris Jr. sa Los Angeles Clippers niining aktoha atol sa Game One sa Western Conference finals. (AP)

Mipakatapog 40 puntos si Devin Booker, 13 ka rebounds ug 11 ka assists alang sa iyang triple double aron itubohy ang Phoenix Suns ngadto sa 120-114 nga kadaugan batok sa Los Angeles Clippers sa Game One sa Western Conference finals.

Kini igo na kaayong nakatapak sa haw-ang nga nabakantihan sa ilang laing star nga si Chris Paul kinsa wala makaduwa human makalapas sa Covid-19 health protocol.

Hinuon wala usab ang pambato sa Clippers nga si Kawhi Leonard kinsa padayon nga nagpaalim sa angol sa iyang tuo nga tuhod.

Human magtabla, 93-93, sa pagsugod sa fourth quarter, ang Suns mipahagsa og 12-2 nga rally ug ang hansak ni Cam Johnson sa 8:08 nga nahabilin maoy naghatag kanila og 105-95 nga bintaha.

Wa moisa ang Clippers sa ilang puting bandera ug gani ang diyes puntos nga labaw ila kining napakubsan, 116-114, human mipabuto og tres si Terence Mann, 22 minutos ang nahabilin.

Apan ang hansak ni Booker sa sunod nga possesion maoy nagselyo sa ikapitong sunodsunod nga kadaugan sa Phoenix.

Ang Game Two ipahigayon karong Martes (Miyerkules sa Pilipinas) diha gihapon sa korte sa Phoenix.

Si Deandre Ayton mitali og 20 puntos ug siyam ka rebounds alang sa Suns.

Nangulo sa Clippers si Paul George nga may 34 puntos ug upat ka rebounds samtang 24 usab ang natampo ni Reggie Johnson, kinsa maoy nihulip ni Leonard sa starting lineup.

Kini maoy unang pagtaak sa Clippers sa finals sa West samtang mao usab kini ang pinakataas nga naabtan sa Suns sulod sa 11 ka tuig ug pabilin nga wala pay kampiyonato.

Si Clippers coach Tyronn Lue mibutyag nga dili pa usab sila siguro kon makaduwa ba si Leonard sa Game Two. (JBM )

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph