SUPERBALITA CEBU

Hawks namanawpanaw sa East finals; gituhak ang Sixers sa Game Seven

Si Trae Young (no.11), ang lider sa Atlanta Hawks, sa iyang one-hand drive niining aktoha sa ilang duwa sa Game 7 sa Eastern Conference semis batok sa Philadelphia Sixers. (AP )

Ang Atlanta Hawks ang gihulagway nga maoy pinakaubos nga team sa playoffs apan sa wala damha maoy namanawpanaw sa Eastern Conference.

Sa deciding Game 7 sa semifinals, kulbahinam nga gipukan sa Hawks ang no. 1 team sa East nga Philadelphia Sixers, 103-96, aron makalabni og lingkuranan sa finals diin ilang ikasangka ang nagpaabot nga Milwaukee Bucks kinsa mipakaging usab sa inilog nga Brooklyn Nets sa laing semis sa niaging adlaw.

Ang uwahing tres ni Trae Young maoy nahimong likoanan sa Hawks paingon ngadto sa kadaugan human sa sikit kaayong duwa nga midayandayan sulod sa upat ka kuwarters.

Mosugod ang Hawks-Bucks series sa Miyerkules (Huwebes sa Pilipinas) sa korte sa Milwaukee.

Sa niaging siyam ka mga series sa playoffs nga miabot og Game 7, ang Atlanta wa gyud nadag-on apan batok sa Sixers kini wala kini nila panumbalinga.

Midaog sila sa korte sa Philadelphia sa Game One ug Game Five sa wala pa nila hingpit palagpota sila si Joel Embid, Ben Simmons ug ang Sixers sa Game 7.

Si Young, ang giilang lider sa Hawks, mitali og 21 puntos ug adunay 10 ka assist apan ang talagsaong gipakitang suporta ni Kevin Huerter maoy nahimong mahait nilang opensa.

Ang 22-anyos nga nakuha sa Hawks niadtong 2018 NBA draft, mipahagsa og 27 puntos nga may duha ka triples ug pito ka rebounds.

Mitimang usab sila Danilo Gallinari (17 pts), John Collins (14 pts., 16 rebounds) ug Clint Capela (13 pts. unom ka rebounds).

Dili man tuod lig-on, apan ubos ni coach Nate McMillan kinsa mihulip sa gitaktak nga si coach Lloyd Pierce sa dihang ika-11 sila sa Eastern Conference nga may 14-20 nga baraha niadtong Marso, way makatuo nga moabot sila niining dapita.

Si Embiid mitapos sa duwa nga may 31 puntos alang sa Philadelphia, gisundan ni Tobias Harris nga mipakli og 24 ug 16 ang natampo ni Seth Curry.

Ang laing star nga si Ben Simmons mipakatap man tuod og 13 ka assists, apan singkos puntos ra usab ang nahimo.

Sa kasaysayan sa NBA, kini mao unang higayon sukad niadtong 1973 nga walay no. 1 seed sa matag conference nga nakasulod sa finals.

Ang Utah Jazz, ang top-seeded sa Western Conference gipalagpot usab sa Los Angeles Clippers, 4-2, sa ilang semis series. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph