DILI na mapugngan ang dagan sa politika sa nasud. Sa dili madugay mahibal-an na sa katawhan kung kinsa ang tinuod nga alyado o kontra.
Ang kauban sa partido kaniadto nahimo nang kaaway samtang ang kaaway kaniadto managkauban na karon.
Sakto ang gisulti nga walay permanenting higala o kaaway sa politika kondili permanenting interes lamang.
Usa sa naigo niini mao ang nag-unang partido politikal sa nasud nga mao ang Partido Demokratiko Pilipino-Laban (PDP-Laban) nga maoy gisakyan kaniadto ni PRody Duterte sa 2016 nga eleksiyon.
Dakong posibilidad nga mosiak kini gikan sa iyang punoan tungod kay ang mga anaa sa taas nga opisyal niini ang nagkabangi nga mora'g walay nakitang kahupayan.
Niadtong niaging bulan nagkabangi sila ni Senador Manny Pacquiao, ang tinudlo nga presidente sa PDP-Laban ni Senador Koko Pimentel ug ni Department of Energy Alfonso Cusi nga maoy Vice Chairman sa partido.
Nagpatawag og National Council meeting si Sec. Cusi didto sa Cebu City apan gipakgang ni Sen. Pacquiao kay dapat daw ang presidente ug ang chairman sa partido ang magpatawag niini. Naghimo pa siya'g memo sa mga opisyal sa partido nga dili motambong sa maong panagtigum nga gipatawag ni Cusi.
Sa kaulahian, nadayon ang panagtigum sa Cebu diin nihatag og pamahayag si PRody pinaagi sa video. Mora'g naigo sa apapangig ang atong Pambansang Kamao kay ang iya mismong mga gitudlo nga opisyal wala tuohi sa maong nasudnong konseho.
Karong bag-o lang, nagpatawag na sab og National Assembly ang PDP-Laban karong Hulyo 17, 2021 didto sa Pasay City aron klaruhon kung kinsa gayud ang tinuod nga lider sa partido.
Base sa konstitusyon sa maong partido, ang National Assembly ang pinakataas nga tighimo'g balaod niini. Kung madayon kining maong asembliya, hayan nga mahukasan sa gahum ang dili mosunod ni PRRD nga maoy kasamtangang chairman sa partido. Apan nakita nako nga dili lang magpatara ang kampo ni Senador Pacquiao ug Pimentel. Seguradong modangop kini sa Comelec ug basin sa Korte Suprema pa aron klaruhon kung kinsa man kanila ang nagsubay sa konstitusyon.
Atong mahinumdoman nga adunay susamang kaso sa PDP-Laban nga nisiak sa kampo ni Sen. Koko ug gidapigan sa Comelec ang kampo ni Pimentel nga maoy lehitimong lider sa partido.
Seguradong maduguon kining panagtigum karong Hulyo 17 nga mora'g boksing nga sa red corner kay ang kampo ni Sen Pacquiao samtang ang sa blue corner kay kang Sec. Cusi. Ang dakong pangutana kay kinsa kaha ang dapigan ni PRody niining panahona?
Sa niaging mga semana, gisulti niya ang posibleng suportahan niya pagka-presidente apil niini si Sen. Pacquiao.
Nagkanayon sab ang presidente nga iyang suportahan si Majority Floor Leader Martin Romualdez kung modagan kini pagka-bise presidente. Wa na daw siyay amor sa politika ug gusto nang mopahulay bisan kung giduso sa National Council meeting sa Cebu nga modagan kini pagka-bise presidente sa bugnong lugaynon sa sunod tuig.
Sa laing bahin, nagkisikisi sab ang kowalisyon sa oposisyon nga gitawag og Sambansa sa ilang mga manok sa pagka-senador. Mao na kini ang dula sa politika nga atong masaksihan sa dili madugay.