DAVAO DE ORO -- Malampusong nalit-ag sa kapulisan ang gikonsiderang regional target sa mga pulis didto sa Purok Ilang-Ilang, Mainit, Maco alas 4:10 sa hapon, Dominggo.
Ang suspek giila nga mao si Romeo Dumayac Rodriguez, 49, minyo, supervisor sa Apex Mining Company ug molupyo sa Purok Lemonsito, Mankilam, Tagum City.
Subay sa report, nasayran nga ang suspek nasikop pinaagi sa kapulisan sa Maco Municipal Police Station, uban sa lain pang yunit atol sa gilusad nga buy-bust operation sa maong dapit.
Matud pa nga nakumpiska gikan sa posisyon sa suspek ang tulo ka pakite nga dunay sulod nga gituohang shabu, P500 bill isip buy-bust money ug kolor pula ug itom nga Honda XR single motorsiklo nga dunay MV File Number 1101-0419396.
Ang dinakpan lakip ang nasakmit nga mga ebidensiya gikustodiya sa Maco Municipal Police Station. (Dexter T. Visitacion)