MATI CITY, Davao Oriental -- Miabot na sa probinsiya sa Davao Oriental ang gikahadlokang variant sa Covid-19 nga mas paspas nga makatakod.
Kini base sa genome sequencing results sa mga samples nga nagagikan sa probinsiya.
Anaa sa 991 ka mga samples gikan sa tulo ka Covid testing facilities sa Davao Region ang gisumite sa Philippine Genome Center niadtong Hunyo 10, 2021.
Sa resulta nga migawas, ang probinsiya sa Davao Oriental dunay siyam ka B.1.1.28 nga variant, usa ka B.1 variant, usa ka B.1.78 variant, ug usa ka A.4 variant, samtang 69 ka samples ang wala pay resulta.
Nahibaw-an nga ang P.1 variant o mas iladong Brazilian variant naggikan sa B.1.128 lineage sa Sars-CoV-2 o Covid-19 maoy isog nga virus.
Sumala kang Mati Incident Management Team commander Dr. Ben Hur Catbagan Jr., ang bag-ong variant ang posibleng hinungdan sa pagsaka sa kaso dili lang sa siyudad sa Mati apan lakip na sa ubang lugar sa Pilipinas.
Giasoy ni Dr. Catbagan nga ilang naobserbahan ang paspas nga transmisyon ug grabe nga mga sintomas gikan sa mga bag-ong kaso nga maoy kinaiya sa bag-ong variant sa Covid-19.
Pahimangno ni Dr. Catbagan nga mapakgang lamang ang paspas nga pagkatag sa virus sa bisan unsang variants kung istrikto ang pag-obserba sa health protocols sa katawhan sama sa pagsul-ob og face mask ug face shield, social distancing, paglikay sa pagtapok-tapok, ug paghugas o disinfect sa kamot gamit ang sabon ug tubig.
Giasoy sab sa Mati IMT nga kinahanglan ang istrikto nga pagpatuman sa health protocols samtang nagapadayon pa ang kampanya sa pagbakuna.
Tungod sa pagdagsang sa mga kaso, ang Davao Oriental Provincial Medical Center dunay labaw pa sa 100 porsyento nga occupancy rate sa ilang higdaanan alang sa Covid-19 atients, samtang ang pag-refer sa moderate hangtud sa severe nga pasyente sa Covid ngadto sa Davao Regional Medical Center (DRMC) sa Tagum City nalangan usab tungod sa pagdaghan sa pasyente.
Aron masolusyunan ang problema sa limitado nga paggahin sa higdaanan sa mga referral facilities, ang Alternate Care Site sa Milagrosa ug uban pang Temporary Treatment and Monitoring Facilities sa siyudad midawat na sa mga pasyenteng dunay pneumonia.
Isip parte sa risk management interventions sa Mati IMT, gisugdan sab nila ang paggamit sa dormitoryo sa Davao Oriental State University (Dorsu) isip usa ka extension isolation facility sugod niadtong Hunyo 9.
Sa pagkakaron, kinse ka mga confirmed mild cases ang na-admit sa pasilidad.
Ang City of Mati-LGU nagrenta usab og pribadong dormitoryo sa Barangay Dahican nga magsilbing isolation facility alang sa Rapid Antigen Test Positive o probable cases samtang gahulat sa RT-CPR confirmatory tests.
Ang City Extension Quarantine Facility nga nahimutang sa Barangay Central magpadayon nga magsilbing temporary quarantine quarters alang sa ROF/LSI/LT nga walay resulta sa RT-PCR tests pagsulod sa siyudad.
Samtang ang tanan nga Barangay Isolation Units magpadayon usab nga back up isolation o quarantine facilities alang sa ROF, LSI, LT, close contacts sa mga kompirmadong kaso ug tele-med patients nga nagpakita og trangkaso samtang naghulat sa testing.
Sa Hunyo 21 nga datos, ang Mati adunay 93 ka aktibo nga mga kaso diin 60 porsiyento ang pagtaas niini kumpara sa bulan sa Mayo. Upat na usab ang natalang namatay karong bulana samtang duha lamang ang namatay sa tibuok bulan sa Mayo.
Duna sab dose ka mga clustering cases ang natala gikan sa health facilities, offices, ug family gatherings.
Apan walay kaso sa impeksiyon nga nagagikan sa LSI ug ROFs lakip na sa mga turista. Si Dr. Catbagan nag-ingon nga sa miaging mga bulan, ang tanang bag-ong kaso gumikan sa local transmissions.
Sa nagpadayong vaccination program sa siyudad, sumala ni Dr. Catbagan nga 7 porsiyento sa target population nga 92,685 ang nabakunahan na.
Tumong sa Mati IMT nga maabot ang 10 porsiyento sa Septyembre, 40 porsiyento sa Disyembre karong tuiga ug 60 porsiyento sa sunod tuig kung igo pa ang mga suplay sa bakuna.
Alang sa dungang kasayuran bahin sa Brazilian variant, usa kini ka sanga sa delikado nga B.1.1.28 variant sa Sars-CoV-2 nga dunay tulo ka mutasyon sulod sa spike protein receptor binding domain mao ang K417T, E484K, ug N501Y.
Matud sa mga eksperto, dunay ebidensiya nga nagsugyot nga ang ubang mutasyon sa P.1 mahimong makaapekto sa transmissibility ug antigenic profile niini.