Adunay ma-knockout.
Kini maoy panglantaw ni kanhi two division champion Danny Garcia sa umaabot nga away tali ni Manny Pacquiao ug Errol Spence.
Ang 42-anyos nga Pacquiao wala makaaway sukad niadtong Hulyo 2019 sa dihang iyang gilangkatan sa World Boxing Association (WBA) welterweight title ang kanhi way pildi nga si Keith Thurmam pinaagi sa split decision.
Karong Agusto 21 sa Las Vegas, si Pacquiao mosuway sa pag-ilog sa duha ka mga titulo ni Spence sa World Boxing Council ug International Boxing Federation (IBF) welterweight divisions.
Si Spence nakaaway niadtong Disyembre 2020 diin iyang gidominar si Garcia sulod sa 12 ka rounds aron angkunon ang unanimous decision nga kadaugan.
Kadto maoy unang away ni Spence sukad siya nakaangkon og injury sa usa ka aksidente sa sakyanan niadtong 2019.
Kon mapildi si Pacquiao, gituohan nga kini maoy iyang katapusang away sa iyang pagpamoksing nga gidayandayanan og walo ka weight division titles.
Apan ang kadaugan maoy maghatag kaniya og laing dakong pangalan nga makulit na usab sa iyang karera.
Hinuon alang ni Garcia nga di gyud masiguro kon kinsa nila ni Pacquiao ug Spence ang ma-knockout basta ang iyang lang nalantawan nga dili moabot og 12 ka rounds ang away.
Si Spence wa pa makatilaw og tumba sukad masukad. Samtang si Pacquiao sa iyang bahin, nakatilaw na og knockout ug ang katapusan niini sa mga kamot ni Juan Manuel Marquez niadtong Disyembre 2012.
“I think it’s a 50-50 fight, to be honest. I can see both of them knocking each other out. And I think this fight is not going to go the distance. I think somebody is getting knocked out. It could be either-or,” asoy ni Garcia sa interbyu sa www.boxingscene.com.
“If Manny fights the way he fought [Keith] Thurman, I believe he can stop Spence. But if Spence comes with his A-game, I think Spence can stop him with a body shot.”
Si Pacquiao adunay 62-7-2, 39KOs nga rekord samtang si Spence naghupot og 27-0, 21KOs nga baraha. (JBM)