Tungod sa kalampusan sa labing una nilang gibuhian nga boxing event nga giulohan og “Engkuwentro Uno”, ang bag-ong natukod nga ARQ Boxing Promotions misaad nga mopahigayon pa og dugang duha ka boxing events sa dili pa motiklop sa tuig 2021.
Mao kini ang gibutyag ni ARQ Boxing sports director Chelito Caro sa mga sakop sa Cebu sports media niadtong Hunyo 19, 2021 human sa Engkuwentro Uno nga gipahigayon pinaagi sa bubble set-up sa Cosonsa Compound sa Mandaue City.
Matod ni Caro nga nakadayeg siya sa gipakitang away sa ilang mga boksidor atol sa Engkuwentro Uno.
Giangkon ni Caro nga kinahanglan pang bairon og maayo ang abilidad sa ilang mga boksidor aron maandam kini sa pangandoy sa ARQ nga makakaplag og world champion sa ugma damlag.
Pinaagi sa hugot nga suporta sa tag-iya sa ARQ nga mao ang magtiayong sila si Jason ug Eva Mari Arquisola, dako ang pagsalig ni Caro nga matuman ang ilang tinguha sa dili madugay.
“Angay atangan sa mga tawo ang among boxing stable tungod sa ka-successful sa among first promotion. Nagpasalamat mi’g dako sa among promoters nga sila Eva Mari Arquisola ug Jason Arquisola kay grabe kaayo ilang support sa atong boxers,” batbat ni Caro.
Gipasabot ni Caro nga gikinahanglang mahatagan og exposure ang ilang mga boksidor maong tinguha nilang mopahigayon og sunodsunod nga boxing promotions sa umaabot.
Ang nag-unang duha ka mga boksidor nga sila si April Jay Abne ug John Paul Gabunillas mipasalig nga buhaton nila ang tanan aron dili mausik ang dakong suporta sa ilang promoters.
“Dako gyud kaayo ang among kalipay kay naa gyu’y heart sa boxing ang among managers,” matod ni Abne.
“Maningkamot ko’g maayo sa training. Dili gyud ko magpabadlong,” asoy sab ni Gabunillas.
Sa Engkuwentro Uno, parehong mirehistro og makapaukyab nga TKO nga kadaugan sila si Abne (6-0, 3KOs) ug Gabunillas (4-1, 3KOs).
Si Abne niposte og 3rd round TKO nga kadaugan batok kang Royder Lloyd Borbon samtang si Gabunillas mikulit og 4th round TKO nga kadaugan batok kang Maurino Agum sa undercard.
Mingdaog sab ang ubang mga boksidor sa ARQ nga sila si Ian Abne, Yeroge Gura, ug Rodex Piala batok sa tagsatagsa nila ka kontra.
Si Abne, manghod ni April Jay, miposte og first-round KO nga kadaugan batok kang Marvin Campos, si Gura midaog batok kang Steven Noblefranca pinaagi sa unanimous decision samtang si Piala midaog batok kang Vicente Casido pinaagi sa majority decision.
Hinuon, adunay duha ka mga boksidor ang ARQ nga nangapilde ug kini mao sila si Zandro Librador ug Arniel Cañete.
Si Librador, kinsa gitawag og “Little Pacquiao”, napilde ni Reycar Auxilio pinaagi sa unanimous decision samtang si Cañete nalupig ni Christopher Caburog pinaagi sa split decision. (ESL)