SUPERBALITA CEBU

Espinoza: Baha ug Covid-19 protocol sa airport

Nagpakabana

Sa miaging’ mga adlaw nga nagsige og uwan, daghan nga kadalanan ug barangay sa Dakbayan sa Sugbo nga gilapawan sa tubig-uwan, lakip na niini ang among dapit diri sa St. Anthony, Hi-way 77, Talamban. Usa sa mga hinungdan nganong dali bahaan ang kadalanan tungod kay puno ang mga kanal ug mga sapa sa hugaw sama sa plastic, papel ug kahoy nga gilabay lang sa mga tawo nga way mga disiplina.

Sa paglimpyo sa dakbayan sa Sugbo sa mga sapa ug kanal sa miaging semana, linibo ka tolinada nga basura nga nagsagol lang ang nahakot sa DPS. Ang daghan niini mao ang nagkadaiyang klase sa plastic. Ang RA 9003, ang “Ecological Solid Waste Management Act of 2000” (Jan. 26, 2001), nga nagtangag og dakong multa sa makalapas, ug ordinansa sa dakbayan batok sa mga hugawan, daghan lang gihapon ang kuwang pa sa disiplina.

Ang among dapit sa St. Anthony niadtong panahon nga si Bise Mayor Mike Rama pa ang mayor nabuhatan og lawom ug lapad nga kanal ang dalan nga mitadlas sa basketbolan padulong sa sapa. Gikan niadto, bisan og magbunok, di jud mabahaan ang dalan. Apan dihang gisemento ang sawog sa basketbolan, aw bisan og 30 minutos nga ulan, bahaan dayon ang dalan.

Sa akong pagsusi, nasaksihan sa mga namuyo sa kilid sa basketbolan nga dunay bahin sa kanal nga natabunan sa pagsemento. Akong gireklamo sa dakbayan ug ni Kon. Gerry Guardo apan igo ra man gitan-aw ug walay aksyon nga gibuhat. Gani, ila pa nga gidepensahan ang kontraktor. Karon, nga nagsige na og uwan kutob na lang ko’g padala ni Konsehal Guardo og mensahe ug hulagway among garahe nga gibahaan. Mag-ampo lang ko nga way dautan panahon nga moabot.

* * *

ANG protocol nga gipatuman ni Cebu Gov. Gwen Garcia sa mouli nga overseas Filipino workers (OFWs) ug returning overseas Filipinos (ROF) ug anha sa Mactan-Cebu International Airport (MCIA) moabot nga sukwahi sa gipatuman sa IATF-DOH, niabot sa Kongreso ug gidungog pinaagi sa Zoom niadtong Hunyo 15 tungod kay walay moatras sa duha.

Ang Executive Order (EO) 17 ni Gobernador Garcia, nga PB Ordinance No. 2021-04 na, wa hatagi og importansya sa IATF kay matud pa ni IATF chief Eduardo Año atol sa pagdungog sa Kongreso nga mas bug-at ang orden sa Presidente sa EO o ordinansa sa mga lokal nga kagamhanan kabahin sa emerhensya sa panglawas tungod ning pandemya sa Covid-19.

Ang dakong pangutana karon, unsay dangatan ni Gobernador Garcia ug sa mga opisyal sa MCIA kon ang PB Ordinance No. 2021-04 maoy ipatuman sa airport ug dili ang IATF protocol sa moabot nga mga OFW ug ROF? Hinumdumi nga si Dr. Jean Loreche, tigpamaba sa DOH-7 nga misuporta sa EO 17 ni Gobernador Garcia, gitakpan na ang baba sa iyang labaw.

Ang akong ipanghinaut nga di ni mahulog sa pamulitika nga isyu kay basin og maapektohan unya ang pag-apodapud sa hinatag nga bakuna dinhi sa atong mga dakbayan ug kalungsoran. Sa pagkakaron, wa pa makaabot sa 10 porsento sa populasyon ang nakumpleto na ang bakuna. (ELE)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph