Dili ko abogado, pero tuguti nga mosulod ko sa teritoryo ni Atty. Eddie Barrita, “Kay balaod lagi,” nga maghisgot ta og kabahin sa balaod. Kining balaura dili ni para sa mga abogado kay nahibawo na sila ani. Alang ni ordinaryong tawo nga nagbuhi og mga iro aron masayod sila sa ilang responsibilidad. Niadtong miaging semana dihay dalagita sa Oslob nga gibugno og duha ka mga dakong iro. Unsay tulubagon sa tag-iya sa iro?
Ania ning Republic Act No. 9482 or Anti-Rabies Act of 2007 (An Act providing for the control and elimination of human and animal rabies, prescribing penalties for violation thereof and appropriating funds therefor;
Base sa Section 5, sa maong balaod (responsibilities of pet owners—Ang tanang mga nagbuhi og iro gimanduan nga: a) Gikinahanglan nga ang ilang mga binuhing iro, regular nga bakunahan batok sa rabies ug magmintinar og registration card nga magbutang sa detalye sa pagpabakuna sa ilang binuhi; b) Mosubmiter sa ilang mga iro sa mandatory registration.
c) Kontrolahon ang ilang mga iro ug dili pasagdan nga maglaroy-laroy sa kadalanan labi pa sa public places nga walay hikot; d) Kinahanglan nga responsable ka nga tag-iya pinaagi sa kanunay nga limpyo ang imong iro, hatagan og maayong pagkaon ug hamugaway nga kapuy-an. (Dili nuon airconditioned ang tangkal); e) Sulod sa 24 oras kinahanglan nga motaho ang tag-iya ngadto sa mga awtoridad kon nakapaak ang iro aron ma-aksiyonan ug ma-monitor ang napaakan sa usa ka veterinarian.
f) Tabangan dayon ang napaakan ug tubagon sa tag-iya ang tanang galastuhan sa biktima sama sa injection sa anti-rabies ug mga medisina. Sa Section 11 paragraph 4 sa maong balaod, nagkanayon nga ang ‘Kon ang tag-iya sa iro magdumili sa pag-abaga sa galastuhan sa napaakan multahan og P25,000. (Aw, kon dako ang magasto, pamulta na lang mo kay mas makabaratu pa mo).
Alang sa kasayuran sa mga bana, way pay balaod nga nag-protiher nato kon bugnuon ta sa atong asawa. Kay ang balaod nag-protoher lang sa kababayen-an ug kabataan. Protection of women and children. Matod pa sa pulis sa Alcoy, “ipabarang lang na.”(bobbygnalzaro@gmail.com)