Gironda niadtong Sabado sa gabii sa Cebu City Police Office (CCPO) ug mga opisyal sa Dakbayan sa Sugbo ang restobar sa usa ka condominium sa Archbishop Reyes Avenue niadtong Sabado sa gabii, Hunyo 19, 2021.
Ilang naabtan ang mga kustomer nga nag-inom bisan oras na sa curfew. Kon sobra na sa duha ka mga botelya sa alcoholic drinks ang nainom, kalapasan usab kini sa executive order ni Mayor Edgardo Labella. Hayan sila nakalapas.
Di kini unang higayon nga dunay mga establisemento nga nakalapas sa liquor ban ug curfew sa Siyudad sa Sugbo sukad napailawom ang siyudad sa modified enhanced community quarantine (MECQ) niadtong Septiyembre 2020.
Gibalik og patuman ni Mayor Edgardo Labella ang liquor ban niadtong Pebrero 3, 2021 human paspas nga nisaka ang mga kaso sa coronavirus disease 2019 (Covid-19). Iya na usab kining gilibkas niadtong Mayo 6 human nagsugod og minos ang mga kaso ug nihangyo ang mga negusyante nga libkason ang liquor ban kay apektado na kaayo ang negusyo.
Apan karon hinayhinay na sab nga nisaka ang mga kaso sa Covid. Gitumbok ni Inter-Agency Task Force Visayas chief implementer Melquiades Feliciano ang paglibkas sa liquor ban nga maoy usa sa mga hinungdan niini. Apan iya usab nga gitataw nga mahimo kaayong magbukas ang mga resto bar ug magpainom basta sundon lang ang minimum health protocol.
Kini nagpasabot nga kinahanglan nga dunay social distancing, magsul-ob kanunay sa mask ug manghunaw kanunay.
Apan sa tinud-anay nga sitwasyon, lisod kining mahitabo. Kon mag-estrikto ang establisemento, naa ba kahay ganahan mosulod aron mag-inom? Wala. Matuman ba ang pag-limit sa ilimnon ngadto sa duha lang ka botelya? Dili sab.
Sakto si Feliciano nga kinahanglan bantayan ang mga establisemento aron motuman. Gikinahanglan ang kapulisan ug partisipasyon sa komunidad niini sa pagbantay sa mga molapas.