Ormoc City--Konsehal sa Lungsod sa San Miguel, Leyte ang nasikop sa buy-bust sa Philippine Drug Enforcement Agency (PDEA) 8 sa Lunes, Hunyo 21, 2021 pasado alas 2:00 sa hapon.
Giila ang dinakpan nga si Municipal Councilor Almar Balais, 67, taga 109-A, V and G Subdivision, Tacloban City.
Matod sa PDEA, dugay na nila gipanid-an si Balais gumikan sa mga report nga ilang nadawat ug nalakip sa listahan nga high value target (HVT).
Usa ka poseur buyer ang nakigtransaksyon sa konsehal ug positibo kini nga napalitan hinungdan nga gideklarar ang pagsikop kaniya.
Nakuha gikan ni Balais ang upat ka pakete sa gituhoang shabu nga mitimbang og 5 gramos ug dunay kantidad nga P16,000 lakip na ang sakyanan niini nga Isuzu MUX.
Gibutyag sa PDEA 8 nga kaduha na nadakpan kaniadto si Balais sa sayong bahin sa paglingkod ni Rodrigo Duterte sa pagka presidente sa nasod.
Dugang pa sa PDEA, bisan kinsa ra ang supplier ni Balais ug ang area of operation niini ang Carigara, Barugo ug San Miguel Leyte.
Naa na sa kustodiya sa PDEA 8 si Balais ug gikatakda nga pasakaan og kaso.
Ang PDEA ug kapulisan sa Rehiyon 8 nangusog sa ilang operasyon batok sa mga tigpayuhot og gidiling drugas.
Samtang, ang Dakbayan sa Ormoc naila kaniadto nga grabe ang impluwensiya sa mga tigpayuhot og druga apan karon gideklarar nga kontrolado na ug luwas puy-an.
Kini nakab-ot ubos sa pagdumala ni Mayor Richard Gomez uban sa iyang kapikas nga si Kong. Lucy Torres-Gomez. (JKDP)