KAPIN na sa 80,000 ka mga indibiduwal sa Dakbayan Sugbo ang nabakunahan batok sa coronavirus disease 2019 (Covid-19) gikan niadtong Marso 24 hangtod sa Hunyo 21,2021.
Base sa record sa Vaccination Operation Center (VOC), nikabat na og 84,416 ka mga tawo ang nahatagan og vaccine gikan sa unom ka vaccination sites sa Cebu City.
Si Dr. Jeffrey Ibones, pangulo sa City Health Department (CFD), nagkanayon nga madugangan pa ang maong gidaghanon sanglit nagpadayon pa ang vaccination rollout gamit ang Pfizer vaccine.
Ang naasoy nga vaccination sites naglangkob sa Robinsons Galleria, SM Seaside Cebu, University of Cebu (UC) Senor High sa J. Alcantara St. sa Sambag 1, SHS Campus, University of Cebu (UC) Banilad Campus ug NOAH Complex sa South Road Properties (SRP).
Matod ni Ibones nga libuan na ka mga tawo ang nagparehistro kinsa gustong magpabakuna apan limitado pa ang bakuna nga anaa sa ilang kustodiya.
Dugang sa pangulo sa CHD nga kon mahurot na ang 10,000 doses sa Pfizer ug kon walay laing bakuna nga maabot, temporaryo na usab nilang hunongon ang pagpamakuna hangtod nga maabot ang laing supply sa vaccines.
Ang mga gustong magparehistro, mobisita lang sa PabakunaTa.com ug i-fill-up ang mga bakanteng porsiyon para makuha ang mga detalye. (PAC)