Paglibkas sa liquor ban ug paglapas sa mga health protocol sa mga resto bar usa sa gibasol sa paghinayhinay og saka sa mga coronavirus disease (Covid-19) sa Dakbayan sa Sugbo.
Matod ni Visayas IATF Chief Implementer Melquiades Feliciano nga sukad sa paglibkas sa liquor ban, nisaka og hinayhinay ang mga kaso sa Covid-19 sa dakbayan.
Matod niya nga mas lisod bantayan ang mga establisemento, labaw na sa contact tracing kay lainlaing tawo ang mosulod sa mga establisemento.
Giluwatan kini ni Feliciano atol sa pakighinabi niya tali sa SunStar editors sa Lunes sa hapon, Hunyo 21, 2021 nga gipasiugdahan sa Project Balik Buhay nga gipangulohan Edmun Liu sa Oakridge.
Gibalik og patuman ni Mayor Edgardo Labella ang liquor ban niadtong Pebrero 3, 2021 human paspas nga nisaka ang mga kaso sa coronavirus disease 2019 (Covid-19) sugod sa tunga-tunga sa Enero 2021.
Iya na usab kining gilibkas niadtong Mayo 6 human nagsugod og minos ang mga kaso sa Covid-19 ug nihangyo ang mga negusyante nga libkason ang liquor ban kay apektado na kaayo ang negusyo
Matod ni Feliciano nga pipila ka mga semana human gilibkas ang liquor ban, hinayhinay usab nga nisaka ang mga kaso sa Covid-19.
Iyang gibutyag nga wa siya masayod sa paglibkas sa ban, apan nakasabot siya nga alang kini sa kaayuhan sa mga negusyante, labina sa mga nanag-iya og restobar. (REV)