SUPERBALITA CEBU

Mosupak sa ordinansa mapriso

BAG-ONG EO: Aron mas dunay ngipon ang Provincial Ordinance No. 2021-05, si Cebu Governor Gwendolyn Garcia niluwat sa Lunes, Hunyo 21, 2021 sa Executive Order No. 23 nga maghimong kriminal ang pagsupak sa ordinansa sa Lalawigan. Mahimo makiha og illegal detention, serious illegal detention ug kidnapping ang mga opisyal ug personnel kon mosaylo sa nalatid sa ordinansa ang gitas-on sa qua­rantine sa mga overseas Filpino worker (OFW) ug returning overseas Filipinos (ROF). (ARVIE N. VELOSO)

Mga opisyal ug personnel sa kagamhanan nga mosupak sa ordinansa sa Lalawigan sa Sugbo sa swab-upon-arrival ug quarantine alang sa mga overseas Filipino workers (OFW) ug returning overseas Filipinos (ROF) mahimong ikiha og kasong kriminal ug administratiba.

Niini, mahimo silang mapriso kon mopasaka og reklamo ang hingtungdang mga OFW ug ROF nga di mosunod sa mga lagda nga nalatid sa Cebu Provincial Ordinance No. 2021-05 base sa giluwatang Executive Order (EO) 23 ni Gobernador Gwendolyn Garcia nga giluwatan sa Lunes, Hunyo 21, 2021.

Subay sa maong kamandoan, gipahinumdoman ug gibauran ang mga sakop sa Department of Health (DOH-7), Bureau of Quarantine (BOQ), Department of Tourism (DOT-7), Philippine National Police (PNP), Mactan Cebu International Airport (MCIA) ug uban pa nga concerned agencies lakip na ang Hotels, Resort and Restaurant Association of Cebu (HRRAC) nga magpabilin ug motuman sa ordinansa alang sa pagpauli sa mga Sugboanon sa lalawigan.

Ubos sa ordinansa, ang mga OFW ug ROF ipaubos gilayon sa swab test sa pag-abot ug i-quarantine lang sa duha ngadto sa tulo ka adlaw samtang magpaabot sa resulta sa swab.

“I called all of them to remind them that this is still a government of laws and not of men and as such in Cebu there is an existing ordinance which clearly spells out the swab on arrival protocol and if found negative within two or three days, may go home to continue their quarantine at home,” pagpasabot ni Garcia.

Kon mosaylo ang gidugayon sa pag-quarantine sa mga OFW ug ROF, mag-atubang kini og mga sumbong.

“Holding them beyond the two or tree day period when there is an existing law in the province of Cebu could expose them to possible charges of kidnapping and serious illegal detention as well as resistance and disobedience to a person in authority or agents of such person,” pagpasabot ni Garcia.

Sukwahi kini sa mga lagda sa Inter-Agency Task Force (IATF) for the Management of Emerging Infectious Diseases nga nagmando sa pagpailawom sa mga OFW ug ROF swab test sa ikapito pa ka adlaw.

I-quarantine una sila og pito ka mga adlaw sa mga hotel una pa ang swab test.

Kon negative, ilang humanon ang quarantine sa balay sud tulo ka adlaw aron matuman ang 10 ka mga adlaw.

Tungod sa kasungian, gipatipas ang mga international flight nga manugpa sa MCIA sugod niadtong katapusang semana sa Mayo hangtod sa Hunyo 12, 2021.

Niini, gikompirmar ni Garcia nga wala mopaubos sa swab test ang tanan nga mga OFW ug ROF nga niabot sa Sugbo sa Dominggo, Hunyo 20, 2021.

Nagtuo siya nga magpabilin una ang epekto sa ordinansa sa Lalawigan samtang wa pa makatambong ang mga sakop sa NIATF sa session sa Provincial Board aron sila mapasabot.

“...the IATF passed Resolution 122 last Friday, insisting again that the IATF protocols be implemented here in Cebu. We had thought that in the interim from the extension of my invitation to the arrival of our technical experts here in Cebu and their eventual presentation to the Provincial Board, it would have maintained a status quo but contrary to my expectations done in good faith, there were certain members of the IATF that ordered the police, that ordered the DOT as well as the DOH and other agencies to fully implement the IATF guidelines,” matod ni Garcia sa Hunyo 21.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph