MAAYONG adlaw sa atong mga Super Suki sa tanang dapit.
Miani sa daghang reaksiyon ang giluwatan nga pamahayag ni President Rodrigo Duterte nga iyang ipabilanggo ang mga dili magpabakuna kontra Covid-19 virus niadtong milabay nga gabii, Lunes.
Daw naupos na ang pailob ni President Digong sa bugnaw nga pagdawat sa katawhang Pinoy nga magpabakuna kontra Covid-19 virus ug daw dili makab-ot ang 70 million nga mabakunahan sa tibuok nasud aron madepensahan ang pagpasa-pasa niini sa katawhan.
Sa kasamtangan, naa palang sa 6 million ang ihap sa nabakunahan niadtong bulan sa Mayo, sumala sa report sa Department of Health.
Kinsa man ang angay basulon sa nag-aginod nga pagpahigayon sa pagbakuna sa katawhan?
Ang sistema nga gina-eskedyul ang mga tawo nga paadtoon sa mga vaccination hub usa sa makalangan tungod priority ang mga pangalan nga naa sa listahan samtang naghuot man unta ang mga nagapila nga buot makabaton sa bakuna ug nangapil sa linya sa pamasin nga masingit sila ug mabakunahan na.
Daghan ang gipanglista apan inig-abot na sa adlaw sa ilang turno dili manipot.
Kon giusab pa unta ang sistema sa paghatag sa bakuna ngadto kang bisan kinsa nga buot modawat, seguro dili na moabot sa punto nga saputon si President Digong hinungdan nga nakaluwat siya sa mga pulong nga ipakulong ang mga magdumili pagpabakuna ug nakalimtan ang katungod sa katawhan nga modesisyon alang sa ilang kinabuhi kay katungod man kini sa matag usa.
Gisabot sa ubang katawhan nga diktador ang pamaagi ni Pangulong Digong tungod sa mga pulong nga iyang giluwatan tungod usa man kini sa mga aspeto diin makasala ang tawo -- sa pulong, buhat ug panghuna-huna.
Isip usa ka Dabawenyo, sayod ta sa estilo ni Digong sukad sa mayor pa siya sa atong dakbayan. Ato mismo nadunggan gikan sa iyang baba nga daghan gyud ang mga gahi'g ulo nga mga Pinoy diin ang uban kinahanglan pa nga imong gamitan og deniktadorya aron motuman. May punto siya apan tungod nia man kita padulong sa eleksiyon, dali nga gisakyan sa uban labi na sa mga buot molangkat kaniya gikan sa iyang lingkuranan sa Malacan+AMwAgw-ang.
Sa mga reaction sa katawhan sa social media, dunay nadismaya kaniya ug posible nga makaapekto sa kandidatura ni Mayor Inday Sara Duterte-Carpio kon modagan siya sa eleksiyon pagka-presidente sunod tuig kon tinuod man nga mga botante sila ni Duterte sa milabay nga Presidential Election.
Lahi sab ang kinaiya sa mga Pinoy kay mas mosuki kon imong hulgaon, magpahinayak ug mas mobati'g kaisog labaw na kung dunay mga modasig kanila sa pagsukol.
Panahon sa diktadorya, nahugno ang kagamhanan ni kanhi President Ferdinand Marcos.
Dugay ta nga nahimong ulipon sa pagdumala sa mga langyaw ug daghang mga Pinoy ang mibuwis sa kinabuhi alang sa atong kagawasan.
Sayud ta nga ang pulong +ACI-Diktadorya+ACI- usa sa mga isyu nga gamiton sa mga buot tapuson ang kasaysayan sa mga Duterte sa umaabot nga eleksiyon.
Taas pa ang panahon aron atong timbang-timbangon ang mga isyu, tinuod ba nga pabalik na sab ta ngadto sa panahon sa diktadorya human ato kining giayran sa milabay nga panahon o isyu lang kini sa mga buot mopuli sa kasamtangan nga administrasyon?