MOIHAP sa 78 ka buok nga bomba ang nakalutan sa Calinan, Davao City Myerkules sa udto, Hunyo 23, diin anaa lamang kini mga usa ka kilometro ang gilay-on gikan sa Task Force Davao Checkpoint sa Barangay Lacson.
Nadiskubrehan ang maong mga bomba human nakalutan sa backhoe operator sa JV Angeles nga nagakalot alang sa project sa Apo Agua.
Gikalot sa backhoe ang porsiyon sa Purok 4, Brgy. Lacson aron ipahiluna ang dako nga tubo sa tubig, apan natingala na lang ang operator sa backhoe nga dunay mga misiwil nga daw mga puthaw.
Dihang iyang gitan-aw, nasuta nga mga bomba diay, kinsa dali sab nga mipahibalo sa kapulisan ug sa TF-Davao.
Sa Purok 4, nakuha ang 14 ka buok nga 81mm ug 4 ka buok sa elumination diin sa porsiyon sab sa Abayon Village nakalutan sab ang 45 ka buok nga 81mm, ug 15 ka buok sa elumination diin mosumada og 78 ka buok ang tanang bomba.
Sumala sa Explosive Ordnance Disposal (EOD) team sa Davao City Police Office (DCPO) puwede pa mobusikad ang maong mga bomba.
Gipanubayan na sab karon sa awtoridad paunsa ug nganong gipanglubong ang maong mga eksplosibo sa dapit.
Sa kasamtangan, gikustodiya na sa EOD-DCPO ang mga eksplosibo alang sa tukmang disposasyon. (Jeepy P. Compio)