DUHA ka locally stranded individuals (LSIs) ug 57 ka mga residente sa Cagayan de Oro ang mipositibo sa novel coronavirus, sumala sa report sa City Health Office Miyerkules, Abril 28.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,733.
Sumala ni Acting City Health Officer Dr. Lorraine Nery, sa 57 ka mga bag-ong lokal nga mga kaso, 28 ang mga close contacts sa mga pasyenteng nagpositibo sa coronavirus, siyam ang mga lokal authorized persons outside residence (Apors), 17 ang mga local index nga mga kaso, ug tulo ang mga patay.
Sa 4,733 nga kinatibuk-ang kaso sa Covid-19 sa syudad, 436 ang mga returning overseas Filipino workers/locally stranded individuals (ROFs/LSIs) ug 4,297 ang mga local transmissions.
Matud ni Nery, sa 4,297 nga mga local nga kaso, 221 ang mga persons deprived of liberty (PDLs), 2,212 ang mga local index cases, ug 1,862 ang mga local cases with link.
Ang Cagayan de Oro adunay 360 ka mga active cases, 99 niini na-admit sa Northern Mindanao Medical Center ug uban pang mga ospital sa syudad, 257 ang mga outpatients, ug upat ang mga ROFs/LSIs.
Nakatala usab og 12 ka mga Covid-positive nga mga kaso nga karon naka-recover. Anaa na karon sa 4,159 ang ihap sa mga nakarekober nga mga kaso sa dakbayan.
Sa maong numero, 308 ang mga LSIs, 122 ang mga ROFs, ug 3,729 ang mga lokal nga kaso (community: 3,167; Apors: 562).
Ang recovery rate sa Cagayan de Oro anaa na sa 87.87 percent.
Ang ihap sa mga namatay sa Covid-19 sa syudad naa sa 214.