OLIVER P. FLORES
Sogod, Cebu
Igo lang unta nakong hawiran ang hangin
Apan naunsa ba nga hangtod ang mga agukoy
Sa baybayon mitamihid man kanako?
Nakaingon na lang ko nga maayo pa ang natulog
Nga kakugnan kay duna pay nagluob nga buntog.
Pastilan ning akong kinabuhi nagsalig lang
Sa palad sa kaluoy! Mora kog buang nga way
Distinasyon sa paglaag-laag.
Unsaon man gud kagang-kagang ang sakyanan
Nga akong gisakyan padulong sa gusto kong adtoan.
Aw, naa gyud ang pagka tapulan sa pag-ugmad
Sa lintunganay sa kaugmaon. Pila pa ba ka buok
Intawon ang ingon ani kanako?
Karon nga pandemya naghangad lang sa ayuda
Nga mahulog gikan sa langit. Sige lang gihapog
Apong sa gilistang mga numero nga nanggawas
Sa swertres iyawat nga makagurdo ug makadaog.
Na, misamot nuon katimawa kay kanunay buslot
Ang bulsa. Apan karon sa akong pagmata ning
Malinawon nga kabuntagon, nabatyagan ko na
Ang mga kamot sa paningkamot nga maoy
Husto nga akong hawiran aron magpadayon
Ang pagpitik sa pulso sa kaugmaran sa kinabuhi!