LAMBERTO G. CEBALLOS
Ilaya, Cawayan, Dalaguete, Cebu
Pulis si Cpl. Kludyo. Sakop siya sa CIDG. Nabaniog siya nga nakahupot og anting-anting dihang gikasangka nila ang pundok sa mga durugista nga gipangulohan ni Alias Demonyo, usa ka druglord, didto sa Ermita. Naigo siya apan wala siya mamatay. Ang bala sa kaaway nitapsing sa krus sa rosaryohang iyang gikuwentas ug ang krus nipilit sa iyang agtang. Nagkadugo ang iyang nawong tungod sa samad sa iyang agtang nga gitugdonan sa krus. Didto sa ospital gilugit sa doktor ang krus ug gitambalan ang agtang ni Kludyo. Paglabay sa tulo ka semana naalim ang iyang samad nga nagbilin og uwat sa iyang agtang nga pormag gamayng krus. Sukad niadto iyang namatikdan nga makakita siya sa dautang umaabot ug maghimo siyag lakang aron malikayan o masumpo ang dautang hitabo.
Usa ka higayon naghimo silag buy-bust operation didto sa Calamba. Si Kludyo nga nag-T-shirt lang maoy nagpaka-aron-ingnon nga mopalit og shabu. Dihang nagpaaingon na unta siya sa drug pusher mikidlap ang uwat sa krus sa iyang agtang ug misantop sa iyang hunahuna nga gilaang sab diay siya sa duha ka durugista nga kauban sa drug pusher nga nakahibawo nga si Kludyo usa ka paon lang. Pinaagi sa selpon gitawgan niya si Capt. Castro ug gisultian sa iyang nahibaw-an. Sakay sa police patrol car (nga wa mag-siren) dali da nga nahiabot si Capt. Castro ug tulo ka kauban sa nahimutangan ni Kludyo. Nakalitan ang mga drug pusher. Miibot sila sa ilang armas ug gitiruhan ang patrol car. Mibawos ang mga pulis ug dihang mihunong ang sinukliay sa mga bala ug buto-buto nanghay-ad ang tulo ka durugista sa yuta.
Dihay usa ka buntag samtang nagsakay si Kludyo sa iyang motorsiklo paingon sa estasyon sa kapulisan sa dakbayan, may nasundan siyang motorsiklo nga duha ang nagsakay ug nagsunod sa usa ka awtong itom. Kalit mikidlap ang uwat sa krus sa iyang agtang ug nahanduraw niya ang sunod nga hitabo: patyon sa riding-in-tandem ang nagsakay sa awtong itom. Unya nadunggan niya ang buto-buto sa armas depuygo. Nakita niya nga miurong ang awtong itom. Giibot niya ang iyang kargadang kalibre .45 ug gigukod ang mga kriminal. Dihang nahaduol na siya gitirohan siya sa backrider nga maoy gunman apan wa siya maigo. Mibawos siya ug naigo kini sa bukubuko. Misaliring ang motorsiklo sa mga kriminal. Miibot and drayber sa iyang armas, apan naunhan siya ni Kludyo. Gitawgan niya sa selpon si Capt. Castro. Sa pasiunang imbestigasyon sa CIDG, nasuta nga ang sakay sa awtong itom mao ang usa ka negusyanteng Koreano nga gustong likidahon sa karibal niya sa negusyo nga mga Koreano sab. Samdan ang Koreano ug ang iyang drayber. Gidala dayon sila sa ambulansiya ngadto sa ospital. Pagka sunod adlaw nagbansiwag ang ngalan ni Kludyo sa headline sa Superbalita: CPL. KLUDYO, MIPATAY SA DUHA KA KRIMINAL; KOREANONG NEGUSYANTE NADALA SA OSPITAL.
Daghan pang mga dautang panghitabo nga nakit-an ni Kludyo sa iyang hunahuna pinaagi sa iyang anting-anting. May usa ka babaye nga luguson unta sa iyang uyab sulod sa awto sa usa ka hilit nga dapit ug naagian ni Kludyo nga nagsakay sa iyang motorsiklo. Naluwas niya ang babaye ug gipusasan niya ang lalake. Diha poy usa ka dalagita nga iyang nalabyan samtang kini naglakaw sa unang Mandaue-Mactan Bridge. Kalit mikidlap ang uwat sa krus sa iyang agtang. Maghikog ang dalagita. Dali niya nga gibalikan ang dalagita nga mikatkat na sa barandilyas sa taytayan aron moambak sa dagat. Gikuptan niya ang mga bukton sa dalagita.
USA ka gabii samtang si Kludyo nagsakay sa iyang motorsiklo paingon sa ilang balay, kalit nga mibunok ang kusog nga uwan. Daw umbangol sa usa ka higante ang dalugdog nga miuliot sa iyang mga dalunggan. Ang kilat mitabas sa langit. Nakahangad siya. Mikilat pag-usab ug nabati niya nga ang hait nga tumoy sa kilat miigo sa uwat sa krus sa iyang agtang. Nalagpot siya gikan sa motorsiklo. Wala na siyay kinabuhi paghitugdon niya sa yuta. Wala makahatag kaniyag timailhan sa iyang kamatayon ang iyang anting-anting. (KATAPUSAN)