Nalzaro: Ipadakop ang dili pabakuna?

Dili pa lang dugay nisulti si Presidente Duterte nga puwedeng kasohan og murder o reckless imprudence resulting in homicide ang tawo nga responsable sa pagtakboy sa Covid 19 ngadto sa lain. Ambot nagkomedya ra ba ang Presidente kay nasayod man siya isip abogado ug kanhi piskal kon unsa ang mga elemento sa murder base sa Revised Penal Code. Gawas lang kon kini ug ang reckless imprudence iamendar.

Sa miaging gabii, nipagawas na usab og pamahayag ang Presidente nga iyang ipadakop ang dili gustong magpabakuna ug ipatusok sa sampot ang bakuna. “Ayaw ko ninyo og kasaypi, adunay krisis nga gi-atubang ang atong nasud. Adunay natural emergency. Ipadakop ta mo kon dili kamo magpabakuna ug anha itusok sa inyong sampot ang bakuna,” matod niya sa sa iyang programa,”Talk To the Nation.”

“Ayaw ko ninyo pugsa. Kon dili gyud mo magpabakuna, panglayas mo dinhi sa Pilipinas. Adto mo sa India o ba kaha sa Amerika. Pero mintras nga naa pa mo dinhi, puwede kang matakbuyan ug ikaw maoy magdala sa virus busa magpabakuna ka. Ayaw tong Ivermectin para sa baboy ang ipatusok nako nimo,” dugang sa Presidente.

Sama sa iyang pamahayag nga kasong murder ipasaka batok sa “super spreader,” naputong lang siguro ang Presidente human niya madawat ang reports nga daghan ang dili gustong nagpabakuna. Apan unsa ba ang iyang basihanan sa pagpadakop? Bisan si Department of Justice (DOJ) Sec. Menardo Guevarra mismo nagkanayon nga walay basihanan nga dakpon ang magdumili sa pagpabakuna kay wala pay balaod niini. Abi ba nako og wa ni pugsanay. Walay pugsanay, apan walay balibaray.

FACE SHIELD

Wala dangti og usa ka semana, mibalitok si Presidente Duterte sa una niyang baruganan nga dili na kinahanglan ang face shield gawas lang kon naa sulod sa hospital. Hinuon, wala kini personal nga gianunsiyo sa Presidente kon dili si Senate President Tito Sotto ang nagbutyag human sa ilang tigom ni Duterte. Apan human sa advise sa medical experts, gipahibawo niya nga ipadayon ang pagsul-ob og face shield sa gawas ug sulod sa building kay proteksiyon gihapon batok sa Covid. Matod pa sa taga LGBT, “maboang ko nimo, Bayot.” (bobbygnalzaro@gmail.com)