Lab-as pa gikan sa ilang pagpalagpot sa inilog nga Philadelphia Sixers, si Trae Young ug ang Atlanta Hawks padayon sa ilang suprisang kalampusan sa Eastern Conference playoffs.
Di pa lang dugay, ilang gipakaging ang inilog nga Milwaukee Bucks, 116-113, sa Game One sa Eastern finals ubos sa pagpangulo ni Young kinsa miposte og 48 puntos nga maoy iyang bag-ong career-high.
Sa maong kadaugan, ang Hawks ning nagpadayon nga playoffs,mipausbaw sa ilang record sa pagpanulong ngadto sa 6-2 ug maoy nagmansa og unang kapildihan sa Bucks diha sa ilang korte ning nagpadayon nga postseason.
Ang Game Two duwaon gihapon sa korte sa Bucks karong Biyernes (Sabado sa Pilipinas).
Gawas sa iyang 48 puntos, si Young mirehistro usab og 11 ka assists ug pito ka rebounds. Dili lang kay si Young ang nakapakita og igong labok sa Hawks kon dili apil usab si John Collins kinsa mipakatap og 23 puntos ug 15 ka rebounds.
Sa pikas bahin, sa naandan si Giannis Antetokounmpo mipaksit usab og 34 puntos, 12 ka rebounds ug siyam ka assistss alang sa Bucks ug 33 puntos usab ang natampo ni Jrue Holiday kinsa milamas usab og 10 ka assists ug lima ka rebounds, apan wala kini makapaigo aron mapatugpa ang Hawks.
Diha pa untay kahigayonan nga maka overtime ang Bucks sa himatyong mga segundos apan nasipyat si Khris Middleton sa iyang tres nga maoy nag-ugbok sa ilang tinguha.
Si Middleton nga may 15 puntos, way nahimo sa three-point area sa iyang siyam ka itsa.
Nagsikit ang duwa gikan sa sinugdanan hangtod sa katapusan, ug ang sunodsunod nga free throws ni Young maoy naghatag og kasiguroan sa Hawks. (JBM)