Usa ang patay, lima ang nangaangol sa aksidente sa dalan sa Miyerkoles sa alas 12:20 sa udto sa national highway sa sityo Manoong, Barangay Don Pedro, Dakbayan sa Bogo, amihanang Sugbo.
Mga ginikanan ug ilang 4-anyos nga anak nga babaye apil sa nangaangol human sila nasaghiran sa trak nga ni-overtake kanila sa wa pa malimbuwad ang four-wheeled nga sakyanan.
Ang namatay giila nga si Nestor Serafin Arcipe, 29, dunay kapuyo, taga Barangay Punta, lungsod sa San Remegio, amihanang Sugbo.
Samtang ang nangaangol giilang mao sila si Rexel Sinangote, 41, minyo, taga Purok Indian Tree, Brgy. Maño, San Remegio, iyang asawa nga si Ivy, 39, ug ilang anak babaye nga si Gabriela.
Lakip usab sa nangaangol ang drayber sa Canter truck (YDA 156) nga si Judy Amistoso, 31, minyo, taga Purok Matinabangon, ug si Justine Eral, 23, truck helper, taga Purok Indelicio, Brgy. Guadalupe, Dakbayan sa Bogo.
Matod ni Police Lt. Colonel Timothy Aniway, Jr., hepe sa Bogo Police Station nga sila si Sinangote ug Amistoso pulos padulong sa lungsod sa San Remegio.
Sa pag-abot sa nahisgutang dapit, si Amistoso ni-overtake sa pamilyang Sinangote nga nagsakay sa Honda Beat nga motorsiklo, apan iyang nasaghiran hinungdan sa pagkatumba.
Tungod usab sa impact, nawad-an og kontrol sa trak si Amistoso, naalsa ang atubangan sa iyang sakyanan tungod sa bug-at nga mga kargang bas ug sinakong semento sa likod.
Si Arcipe nga giingong naghigda sa luyo sa sakyanan nalabay ug napantok ang ulo sa karsada. (GPL)