NAKIGHIUSA ang lokal nga panggamhanan sa Davao City sa tibuok nasud sa pag-ampo alang sa pagpahulay nga dayon sa kalag ni kanhi President Benigno Aquino III.
Ang bandila sa Pilipinas sa tibuok siyudad sa Davao gipahimutang sa "half-mast" hangtud nga ang kanhi presidente malubong.
Gitaho nga ang kanhi presidente namatay sa heart attack, buntag Huwebes, Hunyo 24, sa edad nga 61.
Usa ka ig-agaw nagsulti sa mga tigbalita nga si PNoy nagpahigayon og dialysis sa dihang giatake sa kasingkasing.
Gidali si PNoy sa paghatud ngadto sa Capitol Medical Center sa Quezon City.
Si Foreign Affairs Secretary Teodoro Locsin Jr., kinsa maoy kinsa maoy presidential spokesperson sa kanhi Presidente Corazon C. Aquino, nagkompirma sa kamatayon ni PNoy sa usa ka post sa Twitter.
Samtang ang mga senador nagsubo sa kamatayon sa kanhi presidente.
Si Aquino nagserbi sa Senado gikan 2007 hangtud 2010 una midaug sa pagka-presidente.
Ang bandila sab gawas sa gambalay sa Senado gipahimutang sa "half mast."
Si Aquino nangulo sa Senate Committee on Local Government sa 14th Congress, ug mao sab ang vice chairperson sa Senate Committee on Justice and Human Rights. (WGM/Sunnex)